100 चिंया ले शुरू कुकरी पालन व्यवसाय अब पहुंचिस 1 हजार चिंया तक
हर महिना होवत हे 20 ले 40 हजार रुपिया तक के आमदनी
कलेक्टर श्रीमती प्रजापति ह अजीत हिड़को अऊ वोखर पत्नी के मेहनत लसहराइन
मोहला-मानपुर-अंबागढ़ चौकी, प्रधानमंत्री रोजगार सृजन कार्यक्रम (Prime Minister’s Employment Generation Programme) ले जिला के ग्राम एकटकन्हार रहवइया हिड़को दंपति ल नियमित आमदनी के साधन मिल गए हे। जानबा हे के जिला प्रशासन के सहयोग ले एकटकन्हार रहवइया अजीत हिडको अऊ वोखर पत्नी उषा हिडको ह 100 चिंया ले कुक्कुट व्यवसाय शुरू करे रहिन। अब ये व्यवसाय प्रति महिना एक हजार चिंया तक पहुच गए हे। एखर से हिडको दपंति ल हर महिना 20 ले 40 हजार रूपिया के आमदनी होवत हे। एखर से हिडको परिवार म खुशी के माहोल हे।
विकासखंड मोहला के ग्राम एकटकन्हार रहवइया अजीत हिड़को अउ वोखर पत्नी श्रीमती उषा हिड़को ह बताइस के ओ मन केंद्र शासन के योजना प्रधानमंत्री रोजगार सृजन कार्यक्रम के तहत 5 लाख रूपिया के बैंक ले करजा लेके कुकरी पालन व्यवसाय चालू करे रहिस, जेमां ओ मन ल 35 प्रतिशत के अनुदान तको मिलिस, जेखर से ओ मन ल काफी राहत मिलीस। पहिली ओ मन दुसर के इहां किसानी-मजदूरी के काम करत रहिन, जेखर से बहुत कम आय प्राप्त होत रहिस। फेर आर्थिक तंगी ले जूझत ए दंपती ह कभू हार नइ मानीस अऊ गांव म ही कुछ नवा करे के सोचिस अउ कुकरी पालन के व्यवसाय शुरू करिस। आज हिडको दपंति के मेहनत, संकल्प अऊ दूरदर्शिता ह ऊंखर परिवार ल आर्थिक रूप ले आत्मनिर्भर बना देहे हे।
श्रीमती उषा हिड़को ह बताइस के वो ह पति के संग मिलके कच्चा मकान के एक छोट कन कुरया ले मात्र 100 देशी चिंया ले कुक्कुट पालन शुरू करे रहिस। नियमित प्रयास, प्रशिक्षण अऊ मेहनत के फलस्वरूप आज हर महिना लगभग एक हजार कुकरी मन के उत्पादन करथें। जेखर से ओ मन ल 20 ले लेके 40 हजार रूपिया तक के आमदनी होवत हे। वोखर पति कामधेनु विश्वविद्यालय दुर्ग अंजोरा, खेती-किसानी विज्ञान केंद्र अउ आन सेमिनार मन ले प्रशिक्षण लेके तकनीकी जानकारी प्राप्त करे हे, जेखर से ओ मन ल व्यवसाय म काफी सहयोग अऊ लाभ मिले हे। आज ओखर पूरा परिवार खुश हे। उमन प्रधानमंत्री श्री नरेंद्र मोदी अऊ मुख्यमंत्री श्री विष्णुदेव साय के धन्यवाद ज्ञापित करे हें।
कलेक्टर श्रीमती तुलिका प्रजापति ह हिड़को कोति ले संचालित कुक्कुट फार्म के ए काम मन के अवलोकन करिन अऊ कुकरी पालन के सफलतम व्यवसाय बर अजीत अऊ उषा हिड़को ल बधाई देवत जिला प्रशासन कोति ले हरसंभव मदद के भरोसा देवाइन। उषा हिड़को ह बताइस के वो खुदे बिहान ले जुड़के पशु सखी के रूप म घलोक काम करत हे, जेखर से वोखर आय म घलोक बढ़ोतरी होए हे।
प्रधानमंत्री रोजगार सृजन कार्यक्रम ले हिड़को दंपति ल मिलीस नियमित रोजगार
