बारो महीना पक्की सड़क ले जुड़िस मंगतूपूरा ले गुड़ली बैगापारा
कबीरधाम, प्रधानमंत्री जनमन योजना वनांचल अउ विसेस जनजातीय समूह के इलाका म बुनियादी सुविधा के विस्तार के दिसा म महत्तम पहल साबित होत हे। कबीरधाम जिला के वनांचल इलाका म घलो ये योजना के माध्यम ले सड़क बनाके गांव वाले मन के आवागमन ल आसान बनाए जावत हे। इही कड़ी म मंगतूपूरा ले गुड़ली बैगापारा तक 3 किलोमीटर लंबा पक्की सड़क के निरमान 1 करोड़ 92 लाख 90 हजार रूपिया के लागत ले करे गे हे। पक्की सड़क बने ले गांव वाले मन बर आवागमन पहिली के तुलना म जादा आसान अउ सुरच्छित होईस। विसेस रूप ले बरसात के दिन म आवइ-जवइ म होवइया परेशानी ले गांव वाले मन ल राहत मिलिस।
बोड़ला अंचल के तरेगांव इलाका के ग्रामीण मन कहिन के प्रधानमंत्री जनमन योजना के माध्यम ले वनांचल इलाका म विकास काम मन म तेजी आए ले अब दुरिहा क्षेत्र मन म घलो बुनियादी सुविधा पहुंचत हे। प्रधानमंत्री जनमन योजना के माध्यम ले बनत ये सड़क वनांचल इलाका म विकास अउ सहज आवागमन के नवा रद्दा खोलत हे। पक्की सड़क ले जुड़ाव बढ़े के संग गांव वाले मन के जिनगी म सुविधा अउ भरोसा दूनों बाढ़े हे। वनांचल इलाका म सड़क जइसे बुनियादी सुविधा मिले ले इलाकावासी मन खुसी जाहिर करिन। ग्रामीण मन मुख्यमंत्री श्री विष्णु देव साय अउ उप मुख्यमंत्री एवं कवर्धा विधायक श्री विजय शर्मा के प्रति आभार जताइन।
गुड़ली बैगापारा ले तरेंगांव जाय बर बनिस सुविधाजनक शॉर्टकट रद्दा
इलाका के ग्रामीण मन बताइन के प्रधानमंत्री जनमन योजना के माध्यम ले गुड़ली बैगापारा ले तरेंगांव जाय बर बने पक्का शॉर्टकट रद्दा तइयार होगे हे। पहिली बरसात के दिन म कच्चा रद्दा के सेती आवइ-जवइ म भारी परेशानी होवय। रद्दा खराब होय के सेती दूरी तय करे म जादा बेरा लगय अउ गांव वाले मन ल कतको किसम के कठिनाई के सामना करना परय। अब पक्की सड़क बन जाय ले आना-जाना आसान होगे हे। ग्रामीण मन के कहना हे के सड़क निरमान ले सिरिफ आवागमन के सुविधा भर बढ़िया नइ होय हे, बल्कि एकर लाभ इलाका के रोजमर्रा के जिनगी, पढ़ई-लिखई, स्वास्थ्य सेवा अउ दूसर जरूरी काम बर आवइ-जवइया मन ल घलो मिलत हे।