मातृत्व ल संबल देत प्रधानमंत्री मातृ वंदना योजना

महासमुंद, मां बनना हर स्त्री के जीवन के सबले बड़का सुख होथे, फेर ए सुख के संग बहुत अकन जिम्मेदारी अऊ चुनौती घलोक जुड़े होथे। गर्भावस्था के समय शारीरिक कमजोरी, घरेलू काम मन के दबाव अऊ आर्थिक तंगी अक्सर माता अऊ लइका मन के स्वास्थ्य म असर डालथे। इही कठिनाइ मन ल ध्यान म रखत केंद्र सरकार ह प्रधानमंत्री मातृ वंदना योजना के शुरुआत करिस, जेन आज प्रदेशभर के गर्भवती माता मन खातिर संबल अऊ वरदान साबित होवत हे।
महासमुंद जिला के हितग्राही महिला श्रीमती अंशुनी साय, श्रीमती लकीर देवांगन, श्रीमती राजकुमारी निषाद अऊ श्रीमती तबस्सुम खातून के कहना हे के ए योजना ले ओ मन ल आर्थिक सहयोग मिलीस, संगेच अपन अऊ लइका के स्वास्थ्य के ध्यान रखे के हिम्मत अऊ अवसर घलोक मिलीस। योजना के राशि ले उमन पौष्टिक आहार लीन अऊ आज मां अऊ लइका दुनों स्वस्थ हें। इही अनुभव ओ मन आन गर्भवती महिला मन के संग साझा करके ओ मन ल घलोक योजना ले जुड़े खातिर प्रेरित करत हें।
महिला अऊ बाल विकास विभाग के जिला कार्यक्रम अधिकारी श्री टीकवेंद्र जटवार ह बताइस के ए योजना के उद्देश्य गर्भवती माता मन ल बहुत थिरावन अऊ पोषण ठउका करना हे, ताकि जच्चा-बच्चा दुनों स्वस्थ रहंय अऊ अवइया पीढ़ी मजबूत होवय।
ए महत्वाकांक्षी योजना के तहत  पाछू तीन बछर म महासमुंद जिला के 19,036 गर्भवती माता मन ल 6 करोड़ 32 लाख 84 हजार रूपिया के सहायता राशि देहे गीस। योजना के अंतर्गत पंजीकरण के बाद गर्भावस्था के सातवां महिना म 3,000 रूपिया अऊ प्रसव के साढ़े तीन महिना बाद लइका ल टीका लगे म 2,000 रूपिया देहे जाथे। उहें, दुसरा डिलीवरी म कहूं नोनी जनम लेथे त माता मनल 6,000 रूपिया के विशेष प्रोत्साहन राशि देहे जाथे, जेन बेटी मन के जन्म ल सम्मान अऊ सुरक्षा देथे।
ये योजना केवल आर्थिक सहयोग तक सीमित नइ हे, बल्कि मातृत्व के सम्मान घलोक हे। प्रधानमंत्री मातृ वंदना योजना ह सही म माता मनके जीवन म भरोसा, पोषण अऊ सुरक्षा के उजियारा भरे हे अऊ प्रदेशभर म स्वस्थ अऊ सशक्त समाज के नींव मजबूत करे हे।