सामुदायिक स्वास्थ्य केन्द्र मन ले 753 महिला मन लाभान्वित
सूरजपुर, 03 अगस्त 2024। छत्तीसगढ़ शासन महिला मन के स्वास्थ्य बर गंभीर हे। दूरस्थ अंचल के अस्पताल मन म घलोक बेहतर सुविधा उपलब्ध कराए बर सकारात्मक प्रयास करे जात हे। महिला मन अऊ लइका मन के बेहतर स्वास्थ्य बर गर्भवती महिला मन ल प्रसव पूर्व पौष्टिक आहार, नियमित दवई आराम करे के सलाह देहे जात हे। इही कड़ी म केंद्र सरकार कोति ले शुरू प्रधानमंत्री सुरक्षित मातृत्व अभियान (पीएमएसएमए) के तहत गर्भवती महिला मन ल प्रसव पूर्व देखभाल के सुविधा प्रदान करे जात हे। ए अभियान के तहत लाभार्थी मन ल हर महीना प्रसव पूर्व जांच अऊ दवा के सुविधा देहे जाथे। सूरजपुर जिला म 4 सामुदायिक स्वास्थ केन्द्र मन म सोनोग्राफी के सुविधा उपलब्ध कराए गए हे। योजना के तहत फरवरी 2024 ले अब तक कुल 753 महिला मन के सोनोग्राफी के सुविधा देहे गए हे।
कलेक्टर श्री रोहित व्यास के मार्गदर्शन म महिला मन के सुविधा बर सामुदायिक स्वास्थ्य केन्द्र भैयाथान, ओडगी, प्रतापपुर अउ रामानुजनगर म गर्भवती महिला मन बर सोनोग्राफी के सुविधा के सफलतापूर्वक संचालन करे जात हे। सामुदायिक स्वास्थ्य केन्द्र मन म सोनोग्राफी के सुविधा होए ले दूरस्थ अंचल म रहइया गर्भवती महिला मन बर स्वास्थ्य सुविधा म बड़ राहत मिले हे। ए सुविधा के चालू होए ले महिला मन ल लंबा दूरी तय करना नइ परत हे, जेखर से गर्भवती महिला मन ल शारीरिक रूप ले आराम मिले के संग, समय के बचत अउ आर्थिक बोझ ले राहत मिले हे। सामुदायिक स्वास्थ्य केन्द्र मन म सोनोग्राफी के सुविधा चालू होए के बाद ले सामुदायिक स्वास्थ्य केंद्र भैयाथान म 218, ओड़गी म 101, प्रतापपुर म 220 अउ रामानुजनगर म 214 (कुल 753 ) गर्भवती माता मन के सोनोग्राफी करे गए हे। सोनोग्राफी के सुविधा चालू होए ले जिला के दूरस्थ अंचल के मनखे मन म हर्ष व्याप्त हे।
जानबा हे के प्रसव पूर्व जांच ले लइका ल लेके माता म उत्पन्न होवइया कोनो खतरा या लइका म संभावित कोनो बीमारी के पता लगाए जा सकत हे। इही कड़ी म जिला अस्पताल संग सामुदायिक स्वास्थ्य केंद्र मन म घलोक निःशुल्क सोनोग्राफी के सुविधा चालू करे गए हे। सोनोग्राफ़ी सुविधा ल लेके भैयाथान के रहइया श्रीमती कोमल साहू ह बताइस के ओ ह समुदायिक स्वास्थ्य केंद्र भैया थान म सरलग चेकअप बर आथे। वो ह कहिस के अस्पताल म सोनोग्राफी के सुविधा मिले ले ल बहुत आराम मिले हे। अइसन अवस्था म यात्रा कर के दूरिहा जाय म अड़बड़ तकलीफ होत रहिस फेर अब घर के तीर ये सुविधा मिले ले ओ मन खुश हे। संगेच भैयाथान के ही श्रीमती केसरी बताइस के सोनोग्राफी के सुविधा निःशुल्क होए ले वोकर उपर आर्थिक बोझ कम होय हे। वो ह बताइस के सोनोग्राफी कराए बर पहिली दूरिहा जाना परत रहिस अऊ पइसा घलोक जादा खर्च करे ल परत रहिस अइसन म ये सुविधा जिला के सबो महिला मन बर वरदान के समान हे। ओ मन एखर बर प्रधानमंत्री श्री नरेन्द्र मोदी अउ राज्य के मुख्यमंत्री श्री विष्णु देव साय ल धन्यवाद देहे हें। 4 सामुदायिक स्वास्थ्य केंद्र मन म गर्भवती महिला मन बर सोनोग्राफी के सुविधा हर एक महिना के 09 अउ 24 तारीक के उपलब्ध कराए जात हे।
