रायपुर, पीएम स्वनिधि योजना कइसे छोटे व्यापारी मन के दिन फेर देथे, येकर ताज़ा उदाहरण बखरूपारा (वार्ड 7) के सोनू कुमार हरे। सोनू हाट-बाजार म टार्च अउ प्लास्टिक के खेलौना बेच के अपन गुजर-बसर करत रिहिस। पूंजी कम होय के सेती धंधा आगे नई बढ़ा पावत रिहिस अउ परिवार चलाय म घलो दिक्कत होवत रिहिस।
फेर जब सोनू ला ‘पीएम स्वनिधि योजना’ के जानकारी मिलिस, त ओ ह नगर पालिका म जाके आवेदन करिस। ये योजना के खासियत ये हे के एमा बिना कउनो गारंटी के लोन मिलथे। लोन पास होय के बाद सोनू ह अपन दुकान म जादा सामान भरिस अउ कारोबार ला बढ़ाइस। आज ओकर आमदनी बाढ़ गे हे अउ वो अपन परिवार संग खुसी-खुसी रहत हे।
का हे योजना?
साल 2020 ले शुरू होय ए योजना म फुटपाथ म दुकान लगाइया (स्ट्रीट वेंडर) मन ला पहिली 10 हजार, फेर 20 हजार अउ 50 हजार तक के लोन बिना कुछु गिरवी रखे मिलथे। समय म पटाए ले ब्याज म छूट घलो मिलथे। सोनू ह ए मदद बर पीएम मोदी अउ सीएम विष्णु देव साय ला धन्यवाद देहे हे।
