अब बिजली बिल शून्य, सोलर रिबेट ले होवत हे उपरहा कमई
खैरागढ़-छुईखदान-गण्डई, भारत सरकार के महत्वाकांक्षी ‘प्रधानमंत्री सूर्यघर मुफ्त बिजली योजना’ आम मनखे मन बर खरचा बचाए अउ सफा ऊर्जा पाए के एकठन बने माध्यम बनत हे। खैरागढ़-छुईखदान-गण्डई जिला के छुईखदान विकासखंड के कनक नगर के रहइया श्री इब्राहिम खान ह ए योजना के लाभ लेके न केवल अपन बिजली खरचा ले मुक्त होगे हे, भलुक उपरी कमई घलो करत हें।
श्री इब्राहिम खान ह योजना के तहत अपन घर के छत मा 3 किलोवाट क्षमता के सोलर रूफटॉप प्लांट लगवाइन। एकर ले पहिली ओकर घर के हर महीना बिजली बिल लगभग 1,500 रुपिया आवत रिहिस, जेकर से घर के बजट मा भारी बोझा परत रिहिस। सोलर प्लांट लगे के बाद अब ओकर बिजली बिल पूरा शून्य होगे हे।
हाले मा ओकर सोलर रूफटॉप सिस्टम ले 208 यूनिट बिजली के उत्पादन होइस, जेकर बलदा ओला 425 रुपिया के सोलर रिबेट घलो मिलिस। एकर ले साफ पता चलत हे के ए योजना बिजली बचत के संगे-संग उपराहा आर्थिक लाभ पाए के मौका घलो देवत हे।
श्री इब्राहिम खान के कहना हे के प्रधानमंत्री सूर्यघर मुफ्त बिजली योजना ह ओकर परिवार के हर महीना के बिजली खरचा ला पूरा खतम कर देहे हे। अब ओ ह सफा अउ हरियर ऊर्जा के उपयोग करत पर्यावरण ला बचाए मा घलो अपन बड़का योगदान देवत हे। ओकर मानना हे के ए योजना हर परिवार बर बहुते लाभदायक हे अउ अवइया समय मा ऊर्जा आत्मनिर्भरता कोती एक बड़का कदम हे।
योजना ले मिले अनुभव के बाद श्री इब्राहिम खान अपन आस-पास के लोगन मन ला घलो अपन-अपन घर मा सोलर रूफटॉप सिस्टम लगवाए बर प्रेरित करत हें। ओकर संदेस हे के जादा ले जादा मनखे ए योजना के लाभ उठा के बिजली खरचा बचावयं, उपराहा कमाई करयं अउ सफा-हरियर भारत बनाए मा अपन भागीदारी पक्का करयं।
