प्रधानमंत्री सूर्यघर मुफ्त बिजली योजना ले अंजोर होईस कामती साहू के घर

बिजली बिल होईस शून्य, हर महीना लगभग एक हजार रुपिया के बचत

राजनांदगांव, जिला के छुरिया विकासखंड के वनांचल गांव मोरकुटूम्ब के रहइया मितानीन प्रशिक्षक श्रीमती कामती बाई साहू बर ‘प्रधानमंत्री सूर्यघर मुफ्त बिजली योजना’ आर्थिक राहत अउ ऊर्जा आत्मनिर्भरता के नवा माध्यम बन गे हे। योजना के तहत ओकर घर के छत ऊपर 3 किलोवाट क्षमता के सोलर रूफटॉप प्लांट लगाय गे हे। अब ओकर बिजली बिल लगभग शून्य हो गे हे अउ हर महीना करीब एक हजार रुपिया के बचत होवत हे।
श्रीमती कामती साहू ह बतईस के ओहा मितानीन प्रशिक्षक आय अउ ओकर घरवाला किराना दुकान चलाथे। पहिली हर महीना एक हजार रुपिया ले जादा के बिजली बिल आवत रहिस, जेकर से घर के खरचा बाढ़ जात रहिस। योजना के जानकारी मिले ले ओहा प्रधानमंत्री सूर्यघर मुफ्त बिजली योजना के तहत अरजी दीस अउ अपन घर म सोलर रूफटॉप प्लांट लगवाइस।
कामती साहू ला सोलर प्लांट लगाय बर केंद्र सरकार कोती ले 78 हजार रुपिया अउ राज्‍य सरकार कोती ले 30 हजार रुपिया के सब्सिडी मिलीस। कुल 1 लाख 8 हजार रुपिया के मदद मिले ले बिना कोनो आर्थिक परेशानी के सोलर प्लांट लगाना असान हो पाईस।
सोलर प्लांट लगे के बाद ए महीना ओकर बिजली बिल सुन्न आईस। अब ओकर परिवार अपन जरूरत के बिजली खुद तैयार करत हे। संगेच जादा बिजली ला ग्रिड म भेजके ओकर घलो लाभ पावत हे। एकर से परिवार के आय अउ बचत दूनो म बढ़ोतरी होए हे।
श्रीमती कामती साहू के कहना हे के ए योजना सिरिफ बिजली बिल कम करे तक सीमित नइ हे, बल्कि पर्यावरण संरक्षण के रद्दा म घलो एक बड़का कदम आय। सौर ऊर्जा के प्रयोग ले पारंपरिक ऊर्जा स्रोत ऊपर निर्भरता कम होथे, प्रदूषण घटथे अउ सफा अउ हरित ऊर्जा ला बढ़ावा मिलथे।
श्रीमती कामती साहू ह लोगन मन ले प्रधानमंत्री सूर्यघर मुफ्त बिजली योजना के जादा ले जादा लाभ उठाय के अपील करिस। ओहा प्रधानमंत्री श्री नरेन्द्र मोदी अउ मुख्यमंत्री श्री विष्णुदेव साय के प्रति आभार जताइस अउ कहीस कि ए योजना ग्रामीण अउ वनांचल इलाका के परिवार मन बर बड़ लाभकारी साबित होवत हे। एकर से आर्थिक बचत, ऊर्जा आत्मनिर्भरता अउ पर्यावरण संरक्षण तीनों उद्देस्य एक संग पूरा होत हे।