दुबे महराज के घर के छत लगिस सौर ऊर्जा ले चलइया पावर पलांट

घर के बिजली बिल होइस शून्य, सरकार ल घलोक करत हे बिजली के आपूर्ति
बिलासपुर, प्रधानमंत्री सूर्यघर योजना ह सौर ऊर्जा के माध्यम ले बहुत अकन घर मन ल रोशन करे हे। बिलासपुर जिला के रहवइया शशांक दुबे ह अपन घर के छत म सौर ऊर्जा पावर प्लांट स्थापित करे हे। ए सौर ऊर्जा संचालित प्लांट ले ओखर घर रोशन होवत हे, संगेच ओखर बिजली बिल घलोक अब शून्य हो गए हे। अतकेच न ही, दुबे अब सरकार ल घलोक बिजली के आपूर्ति करत हे।
दुबे ह बताइस के जब ले वो ह अपन घर के छत म सोलर पैनल लगवाए हे, तब ले वोखर घर के बिजली बिल पूरा शून्य हो गए हे। सौर पैनल मन के माध्यम ले छत म होवत बिजली उत्पादन वोखर मासिक बिजली व्यय के पूर्णतः बचत करत हे। वो ह बताइस के वोखर छत म पाँच किलोवाट क्षमता के सोलर पैनल स्थापित हे, जेखर से होवत बिजली उत्पादन ले ओ ल अब मासिक बिजली बिल के कोनो चिंता नइ हे, संगे ओ ह एक उत्पादक के रूप म बिजली के सप्लाई घलोक करत हे। सोलर पैनल लगवाए के बाद वोखर घर के बिजली बिल आतेच नइ हे।
दुबे महराज ह बताइस के पाँच किलोवाट सोलर पैनल लगवाए म ओ ल लगभग दू लाख रूपिया के लागत आईस, जेमां केंद्र सरकार कोति ले ₹78,000 के सब्सिडी मिले हे, अऊ राज्य सरकार कोति ले घलोक वोला ₹30,000 के अकतहा सब्सिडी मिले हे।
वो ह बताइस के ए योजना के अंतर्गत केवल एक पइत निवेश करना होथे, जेखर बाद 25 बछर तक निर्बाध रूप ले बिजली के आपूर्ति मिलत रइही। योजना के लाभ प्राप्त करे बर उपभोक्ता पोर्टल या पीएम सूर्यघर ऐप के माध्यम ले पंजीयन कराए जा सकत हे। दीर्घकालिक दृष्टि ले ये योजना बहुत किफायती सिद्ध होही, जेमां बैंकों ले कम ब्याज दर म करजा सुविधा घलोक देहे जाथे।