प्रधानमंत्री सूर्यघर योजना ले उपभोक्ता मन ल मिलत हे राहत

कोनी के रहवइया रमेश साहू के बिजली बिल होइस शून्य
बिलासपुर, केन्द्र सरकार के प्रधानमंत्री सूर्यघर योजना अब उपभोक्ता मन के जिंदगी म बड़का बदलाव लावत हे। प्रदेश के बिजली उपभोक्ता ए योजना के लाभ लेहे खातिर अब आगू आवत हें। अइसनहेच बिलासपुर जिला के ग्राम कोनी के रहवइया रमेश साहू ह अपन घर के छत म 3 किलोवाट के सोलर पैनल लगवाए हे। एखर बाद ओखर बिजली बिल शून्य हो गए हे। ए योजना बर वो ह प्रधानमंत्री, मुख्यमंत्री के आभार जताए हे।
कोनी म रहइया रमेश साहू बताथे के वोखर घर म बिजली के खपत काफी जादा रहिस हर महिना अवइया बिजली के बिल ले ओ ल बड़का आर्थिक भार झेलना परत रहिस। सूर्यघर योजना के बारे म जानकारी मिले म वो ह 3 किलोवाट के सोलर पैनल लगवाइस जेकर लागत करीब दू लाख रुपिया रहिस। ए प्लांट म ओ ल केन्द्र सरकार ले 78 हजार रूपिया के सब्सिडी मिल गे हे, जबकि राज्य सरकार ले मिलइया 30 हजार रूपिया के सब्सिडी घलोक लउहे मिलइया हे। वो ह कहिस के अब ओ ल बिजली बिल के चिंता ले मुक्ति मिल गए हे।