रायपुर, 01 जून 2024/ आदिम जाति अउ अनुसूचित जाति विकास विभाग के प्रमुख सचिव श्री सोनमणि बोरा ह कहिन के विभाग म प्रचलित फाईल मॉनिटरिंग सिसटम म जरूरी सुधार करे के जरूरत हे। उमन कहिन कि अभी हाल म कार्यालय के फाईल मन ल खोजे के संबंध म कोनो उचित व्यवस्था नइ होए के सेती नस्ती मन ल खोजे म अड़बड़ समय लागथे। उमन ये मा सुधार बर इंडेक्स प्रणाली अपनाए उपर जोर दीन जेमां सबो नस्ती मन के क्रमांकवार/विषयवार एंट्री करे जाय, ताकि – कोनो फाईल ल खोजे म अनावश्यक विलंब ले बांचे जा सकत हे। ओ मन काली इंद्रावती भवन स्थित मुख्यालय के विभागीय अधिकारी अउ कर्मचारी मन के कामकाज के समीक्षा करत रहिन।
बैठक के पहिली श्री बोरा ह मुख्यालय स्थित आदिम जाति विभाग के परिसर म घूमके निरीक्षण करिन अउ उहां उपस्थित अधिकारी-कर्मचारी मन ले ऊंखर काम के संबंध म जानकारी लीन। ए बेरा म उमन काम के परंपरागत पद्धति म जरूरी सुधार करे के निर्देश मौका म उपस्थित अधिकारी मन ल दीन। उमन कहिन कि सबो विभाग मन म बहुत जल्दी ‘‘ ई-ऑफिस’’ कार्यप्रणाली शुरू होवइया हे। एखर से ना केवल काम म पारदर्शिता लाय म मदद मिलही, भलुक काम म होवइया अनावश्यक विलंब ले घलोक बचे जा सकही। एकर बर विभाग म ए संबंध म पहिली ले ही काम शुरू करे के निर्देश उपस्थित अधिकारी मन श्री बोरा ह दीन। सचिव सह आयुक्त श्री नरेन्द्र कुमार दुग्गा ह विभागीय योजना मन के सारगर्भित जानकारी दीन अउ एला पूरा करे के कार्ययोजना ल प्रस्तुत करिन।
प्रमुख सचिव श्री बोरा ह विभागीय वेबसाईट ल अपडेट करे के निर्देश दीन। हर एक शाखा के जुन्ना सामान अउ ई-कचरा मने खराब इलेक्ट्रॉनिक चीज मन ल कइसे डिस्पाजल अउ नीलामी के कार्यवाही करे जा सकत हे, ए संबंध म कार्यवाही ठउका करे के निर्देश दीन। उमन कहिन के आप मन कार्यालय के साफ-सफाई म घलोक विशेष ध्यान दव। उमन न्यायालयीन प्रकरण मन के सॉफ्टवेयर के माध्यम ले ऑनलाइन एण्ट्री करे बर पोर्टल बनाए के निर्देश दीन। पीएम-जनमन योजना उपर समीक्षा करत उमन कहिन कि ए योजना बर आदिम जाति विभाग ही नोडल एजेंसी हे जेखर सेती केन्द्र सरकार के गतिशक्ति पोर्टल के जइसे ही राज्य स्तर म घलोक डाटा संधारण बर एक पोर्टल बनाय जाय एखर बर संबंधित अधिकारी मन ल उमन निर्देशित करिन। वन अधिकार अधिनियम के समीक्षा करत उमन कहिन के आप मन ऑनलाइन पोर्टल म अपडेशन काम ल जल्दी पूरा करव। एखर अलावा आन विभागीय योजना मन के अपडेट प्रगति के संबंध म घलोक उमन संक्षिप्त जानकारी लीन अउ एला पूरा करे के संबंध म जरूरी दिशा-निर्देश दीन। समीक्षा बैठक म वित्त नियंत्रक श्री आनंद तिवारी, कार्यपालन अभियंता श्री त्रिदीप चक्रवर्ती, अपर संचालक श्री संजय गौड़, श्री ए.आर. नवरंग, श्री आर.एस.भोई, उपायुक्त श्री प्रज्ञान सेठ, श्रीमती माया वारियर, श्री बी. के. राजपूत संग एनआईसी कोति ले नियुक्त एजेंसी के अधिकारी उपस्थित रहिन।