भरोसे का सम्मेलन म मुख्यमंत्री श्री भूपेश बघेल के संग पहुँची बिसेस अतिथि श्रीमती प्रियंका गांधी ह कहिस ..बस्तर के लोगन मन अबड़ बढ़िया अउ ओमन के कला ह तको अबड़ सुघ्घर हे ..
जगदलपुर, नेहा राठौर के खबर/ भरोसा के सम्मेलन म जगदलपुर म मुख्यमंत्री श्री भूपेश बघेल के संग कारीकरम के बिसेस पहुना श्रीमती प्रियंका गांधी ह योजना के फाईदा लेवईया मन कोती ले लगाए गए परदरसनी ल किंदर के देखिन अउ अबड़ सराहिन घलो। ओ ह कहिन काजू, मिलेट्स ले बने बिसकुट अउ पापड़ी(चिकी) के लिहिन सेवाद .. कहिन बस्तर के बने खई खजेना अति सुवादिस्ट हे। इंहा के लोगन मन अबड़ बढ़िया हे अउ ओमन के कला ह तको अबड़ सुघ्घर हे
बस्तर के मनखे मन रिस्ता जोडे ल जलदी जानथे। एक झन बहिनी ह आइसकिरिम बनाए रिहिन अउ मै ह ओकर तिर पहुंचे त कहिन अभी झिन खा दीदी आइसकरिम ह ठंडा हे तोला मंच म अभी बोले जाए ल हे…
ए ह एक बहिनी के भरोसा आए, एक घनी म मोर ओकर संग रिस्ता ह बन गिस।
मुख्यमंत्री श्री भूपेश बघेल ह श्रीमती गांधी ल अलग अलग इस्टाल म रखाए जिनिस मन के बारे म बताइस।
एसएचजी के महिला मन ह श्रीमती प्रियंका गांधी वाड्रा ल कोसा के साड़ी भेंट करिस । आमचो बस्तर स्टॉल म श्रीमती गांधी ह माटी अउ तांबा के बरतन बनोइया मन करा गोठ बात करिस। मनवा नवा नार स्टॉल म बस्तर म राईज सरकार के बिसबास, विकास अउ सुरक्छा के जउन काम करे हे ओला सराहिस हे ।
श्रीमती प्रियंका गांधी वाड्रा ह बस्तर फाइटर्स के महिला जवान मन करा गोठ बात करिस अउ ओमन के संग म फोटो घलो खिंचइस।
परदरसनी म बस्तर संभाग के जिला डहर ले जिला म महिला समूह कोती ले करे जाए वाले बुता अउ नवाचार योजना जुड़े प्रदर्शनी ल जाके देखिन।
जेमा बस्तर जिला ले परदरसनी म फोटो के माध्यम ले बस्तर संभाग म नेहरू अउ गांधी परिवार के करे गए यात्रा ल देखाइस। बस्तर काॅफी उत्पादन अउ प्रसंस्करण तकनीक के जीवंत प्रदर्शन, बस्तर कलागुड़ी हस्तशिल्प कोती ले लकड़ी के नक्काशी, जिला प्रशासन के नवाचार थींक-बी ले जुड़े माम्स फूड, पुलिस विभाग के सामुदायिक पुलिसिंग मनवा नवानार, टसर कोसा ले धागाकरण अउ वस्त्र बुनाई, बस्तर फूड फर्म कोती ले महुआ के चाय अउ कछु कछु उत्पाद, वन विभाग के अमली अउ काजू प्रसंस्करण निर्माण के प्रदर्शन करे गईस।
