धमतरी म उपार्जन केंद्र बनिस खुसी के अंगना

धमतरी, खरीफ विपणन साल 2025-26 म धमतरी जिला के उपार्जन केंद्र ए पइत कोनो उत्सव स्थल के जइसन रौनक बगरावत हे। भिनसरहा होतेच जब धान ले लदे गाड़ी मन केंद्र कोति बढ़थे, त माटी के सोंधी खुशबू अऊ किसान मन के चेहरा मन म झलकत भरोसा—दूनों मिलके उम्मीद मन के एक सुंदर दृश्य रच देथे।  राज्य म 15 नवंबर ले शुरू होए धान खरीदी ह जिला म नवा ऊर्जा अऊ उत्साह के माहौल बना देहे हे। सुव्यवस्थित प्रबंधन, मोबाइल ऐप के साथ टोकन सुविधा अऊ समर्थन मूल्य म खरीदी ए सब ले किसान मन के बड़का चिंता दूर होए हे।
किसान उन्नति योजना के तहत 3100 रूपिया प्रति कुंटल के मूल्य मिले ले किसान मन के खुशी ए पइत दुगुनी हे। पूरा साल के मेहनत जब उचित दाम म बदलथे, त किसान के मन घलोक फसल के जइसे भरपूर संतुष्‍ट हो उठथे। ग्राम अछोटा के किसान लेखराम देवांगन के मुस्कान घलोक आज इही खुशी के प्रमाण हे। 80.40 कुंटल धान लेके केंद्र पहुँचे लेखराम बताथे के किसानी कभू आसान नइ होवय, फेर जब व्यवस्था संग देथे, त कठिन रद्दा घलोक सरल होए लगथे।
पउर साल धान बिक्री ले होए आय अऊ कुछ बचत ले वो ह नवा ट्रैक्टर बिसाए हे। एखर से खेती के काम तेज होय हे, किसानी के करजा चुकता हो सके हे अऊ सिंचाई घलोक बोरवेल के भरोसे सुचारू होवत हे। सहकारी समिति ले खाद-बीज के समय म उपलब्धता ह घलोक ओ ल खेती म पूरा ध्यान देहे के मौका देहे हे। ओ मुख्यमंत्री श्री विष्णु देव साय अऊ प्रशासन के प्रति आभार व्यक्त करत कहत हे के खरीदी प्रक्रिया ल ए पइत अतना सरल अऊ प्रभावी बनाय गए हे के किसान बिना कोनो परेशानी के अपन धान बेच पावत हे।
ए साल उपार्जन केंद्र मन म कई नवा अऊ बेहतर व्यवस्था देखे ल मिलत हे। सटीक तौल खातिर इलेक्ट्रॉनिक मशीन, भरपूर बारदाना,पीए के पानी के सुविधा, प्रतीक्षारत किसान मन खातिर छाँव, बायोमैट्रिक सत्यापन अऊ ‘टोकन तुंहर हाथ’ मोबाइल ऐप, जेन हर लंबा लाइन ले राहत देवात हे
जिला के सबो केंद्र मन म मोटा, पतला अऊ सरना किसिम के धान सुचारू रूप ले बिसाए जात हे। समर्थन मूल्य संबंधी दर सूची घलोक केंद्र मन म प्रदर्शित हे ताकि प्रक्रिया पूरा पारदर्शी बने रहय।
धान ले भरे बोरा मन के लेन, किसान मन के उत्साह अऊ प्रशासन के मुस्तैदी—इन सबके बीच ए पइत के खरीदी सिरिफ एक आर्थिक प्रक्रिया भर नो हे, बल्कि मेहनत, आशा अऊ संतोष ले बुने किसान मन के एक सुंदर कहानी बन गए हे।