रायपुर। मुख्यमंत्री भूपेश बघेल ले काली संझा ऊंखर निवास कार्यालय म ‘मेरी चिड़िया’ नाम के हिन्दी फीचर फिल्म के निर्माण यूनिट के सदस्य मन ह सौजन्य मुलाकात करिन। फिल्म के निर्माण छत्तीसगढ़ रामापीर स्टूडियो अऊ फोक फीचर फिल्म के बैनर तले करे जात हे। मुख्यमंत्री बघेल ह ये बेरा म फिल्म निर्माण इकाई के आग्रह म मेरी चिड़िया फिल्म बर मुहूर्त शॉट दीन। मुख्यमंत्री बघेल ह छत्तीसगढ़ म फिल्म निर्माण उपर प्रसन्नता व्यक्त करत कहिन कि राज्य म फिल्म निर्माण ल बढ़ावा देहे बर हरसंभव पहल करे जात हे। राज्य सरकार कोति ले नवा फिल्म नीति तियार करे जात हे। जेमां फिल्म निर्माण ल प्रोत्साहन देहे बर हर जरूरी प्रावधान करे जाही। इहां के धरती म जिहां कई ऐतिहासिक, सांस्कृतिक अऊ पुरातात्विक महत्व के स्थल हे, उहें वन संसाधन मन ले भरपूर छत्तीसगढ़ राज्य बहुत अकन नयनाभिराम मनोरम दृश्य मन ले घलोक भरे-परे हे। एकर जइसे राज्य म फिल्म निर्माण बर उपयुक्त अऊ बेहतर सुविधा मन के बहुत उपलब्धता हे। मुख्यमंत्री बघेल ल ये बेरा म फिल्म निर्माण इकाई ह बताइस कि छत्तीसगढ़ के कई ठन स्थान मन म ‘मेरी चिड़िया’ फिल्म के दृश्यांकन करे जाही। एखर बर फिल्म निर्माण इकाई कोति ले राज्य म स्थित ऐतिहासिक धरोहर अऊ रमणीय पर्यटन स्थल मन म सिरपुर, सरगुजा, मैनपाट अऊ बस्तर क्षेत्र के स्थल के चयन करे गए हे।
मुख्यमंत्री भूपेश बघेल ले ‘मेरी चिड़िया’ फिल्म के निर्माण यूनिट के सदस्य मन ह करिन मुलाकात
