रायपुर, 10 अगस्त 2020। विश्व हाथी दिवस के अवसर म आज 10 अगस्त के सूरजपुर जिला म स्थित हाथी राहत अऊ पुनर्वास केन्द्र रमकोला (तमोर पिंगला अभ्यारण्य) म हाथी मन के संरक्षण अऊ जागरूकता संबंधी कार्यक्रम के आयोजन करे गीस। कार्यक्रम म वन मंत्री श्री मोहम्मद अकबर के संदेश के वाचन घलोक करे गीस। ये बेरा म रमकोला केन्द्र के हाथी मन ल सजाके अऊ तिलक लगाके केला, सेव, कटहल, नारियल, गन्ना अऊ खिचड़ी खवाए गीस।
विश्व हाथी दिवस म वन मंत्री श्री अकबर के संदेश के वाचन करत अवगत कराए गीस के धरती के ये विशालकाय वन्यप्राणी के रहवास क्षेत्र ल अच्छा बनाए अऊ मानव हाथी सह-अस्तित्व के स्थिति निर्मित करे बर हम सब मिलके प्रयास करन, ताकि हाथी मन के संरक्षण के संगें-संग वनवासी मन अऊ ऊंखर सम्पत्ती ल घलोक सुरक्षित रखे जा सकय। छत्तीसगढ़ म करीबन 35 साल पहिली हाथी मन के आगमन राज्य के उत्तरी अऊ उत्तरी पूर्वी सीमा ले क्रमशः तत्कालीन बिहार अउ अभी हाल के झारखण्ड अऊ ओड़िशा राज्य ले होए हे। तब ले लेके आज तक राज्य के सूरजपुर, बलरामपुर, सरगुजा, कोरिया, जशपुर, कोरबा, रायगढ़, महासमुंद, धमतरी, बलौदाबाजार अऊ गरियाबंद जिला मन म हाथी मन के विचरण होवत हे। अभी हाल म राज्य म हाथी मन के संख्या 285 के आस-पास हे।
प्रधान मुख्य वन संरक्षक श्री राकेश चतुर्वेदी अऊ प्रधान मुख्य वन संरक्षक (वन्यप्राणी) श्री पी.व्ही. नरसिंग राव के मार्गदर्शन म आयोजित ये कार्यक्रम म हाथी मन के संरक्षण अऊ जागरूकता संबंधी विसय म विस्तार ले चर्चा होइस। अपर प्रधान मुख्य वन संरक्षक (वन्य प्राणी) श्री अरूण पाण्डेय ह बताइस कि ये मा हाथी मन के संरक्षण, क्षतिपूर्ति बर समय म मुआवजा वितरण, हाथी मानव द्वंद अऊ सह-अस्तित्व आदि विषय उपर चर्चा करत जन-जागरूकता संबंधी उपाए मन के बारे म घलोक विस्तार ले जानकारी देहे गीस। ये बेरा म उप निदेशक हाथी रिजर्व सुश्री प्रभाकर खलखो ह बताइस के मानव अऊ हाथी के बीच सह-अस्तित्व के स्थिति निर्मित होवय, एखर बर जन-जागरूकता उपर विशेष जोर देहे जात हे। कार्यक्रम म जिला पंयायत सूरजपुर के अध्यक्ष श्रीमती राजकुमारी मराबी अऊ हाथी रिजर्व सरगुजा के क्षेत्र निदेशक श्री एस.एस. कंवर संग संबंधित विभागीय अधिकारी अऊ कर्मचारी उपस्थित रहिन।
