अंजोर के भरोसा लेहे देश के सबले बड़े अस्पताल चेन्नई के शंकरा नेत्रालय पहुंचिन दृष्टिहीन बहिनी चंदा अऊ रिया
रायपुर, मुख्यमंत्री श्री भूपेश बघेल के संवेदनशीलता लउहेच काखरो अंधियार दुनिया म उजेला बगरइया हे। मुख्यमंत्री के वादा के मुताबिक बलरामपुर जिला के बिक्कट गरीब परिवार के दृष्टिहीन बहिनी चंदा अऊ रिया इलाज बर चेन्नई के प्रख्यात शंकरा नेत्रालय अस्पताल पहुंच गे हें। सुकरवार के नेत्र विशेषज्ञ डॉक्टरों के निर्देशन म दुनों नोनी मन के आंखी के प्रारंभिक जांच होइस। उहां के डॉक्टर मन ह बताइन के नोनी मन ल जेनेटिक बीमारी हे जेखर बर अऊ परखर जांच के जरूरत हे। आज सनिच्चर के घलोक बाकी के जांच करे गीस।
आप मन जानतेच हव के 5 मई के बलरामपुर के आरागाही गांव के भेंट मुलाकात कार्यक्रम म आर्थिक रूप ले कमजोर अनती देवी मुख्यमंत्री ले अपन दुनों दृष्टिहीन नोनी मन के सहायता के मांग करत रो डरे रहिस। मुख्यमंत्री श्री भूपेश बघेल ह संवेदनशीलता देखात अनती देवी ले कहे रहिन कि तूं मन चिंता झन करव, तुंहर लइका मन के इलाज म सरकार कोनो कसर नइ छोड़य। देश के जेन अस्पताल म इलाज होही हम उहां इलाज कराबो। मुख्यमंत्री ह आश्वासन देवत कहे रहिन कि दिल्ली हो या चेन्नई जिहां इलाज संभव होही, नोनी मन के इलाज कराबो। गरीब परिवार के नोनी मन के इलाज के पूरा खरचा राज्य सरकार उठाही।
जानबा हे के मुख्यमंत्री के हुकुम के बाद चंदा अऊ रिया ल सबले पहिली जांच बर रायपुर एम्स लाए गए रहिस। जिहां डॉक्टर मन ह चेन्नई के प्रख्यात शंकरा नेत्रालय जाय बर अनुशंसा करिन। एखर बाद स्वास्थ्य विभाग के टीम के संग दुनों नोनी ल परिवार संग चेन्नई भेजे गए हे।
मुख्यमंत्री ह भेंट-मुलाकात म गरीब दाई मेर खाए रहिन किरिया, आज होवत हे पूरा
