महासमुंद के किसान हिमांशु बंजारे ह ढैंचा के हरियर खातू ले सुरू करिस जैविक खेती, मिट्टी के उर्वरा शक्ति बढ़ाय अउ लागत घटाय बर बनिस मिसाल
महासमुंद, मुख्यमंत्री श्री विष्णु देव साय के अगुवाई म छत्तीसगढ़ सरकार प्राकृतिक, जैविक अउ टिकाऊ खेती ला बढ़ावा देहे खातिर सरलग उदीम करत हे। राज्य सरकार के किसान हितैषी नीति अउ कृषि विभाग के मार्गदर्शन के सुग्घर असर अब गांव मन म साफ-साफ दिखे लगे हे। किसान मन आधुनिक तकनीक के संगे-संग पारंपरिक अउ पर्यावरण के अनुकूल कृषि पद्धति मन ला अपनाके खेती ला जादा लभप्रद अउ टिकाऊ बनावत हें।
इही कड़ी म महासमुंद जिला के बसना विकासखंड के अंतर्गत अवइया गांव बड़ेसाजापाली के प्रगतिशील किसान श्री हिमांशु बंजारे ह जैविक खेती के रद्दा म एक बड़का कदम उठावत अपन 0.80 हेक्टेयर कृषि रकबा म ढैंचा के हरियर खातू के फसल लगाय हे। लगभग 30 दिन के हो गए ए फसल ला तय समय म खेत म पलटके हरियर खातू के रूप म प्रयोग करे जाही, जेकर से भुंइया के उर्वरा सकती बाढ़ही, रासायनिक खाद ऊपर निर्भरता कम होही अउ अवइया फसल मन के उत्पादकता म सुधार होय के संभावना हे।
श्री हिमांशु बंजारे के कहना हे के जैविक अउ प्राकृतिक खेती ह न सिरिफ खेती के लागत ला कम करथे, बल्कि मिट्टी के गुनवत्ता ला घलो बहुत दिन तक बनाके रखे म बड़ भूमिका निभाथे। ओहा बतईस के ढैंचा जइसे हरियर खातू वाले फसल मन के प्रयोग ले खेत मन म प्राकृतिक रूप ले पोषक तत्व मन के उपलब्धता बाढ़थे अउ उत्पादन अउ जादा टिकाऊ बनथे। ओहा दूसर किसान मन ले घलो ए पद्धति ला अपनाके पर्यावरण अनुकूल खेती ला बढ़ावा देहे के बिनती करिस।
उप संचालक कृषि श्री एफ.आर. कश्यप ह बतईस के हरियर खातू ह मिट्टी के उर्वरता अउ संरचना सुधारे के बड़ कारगर माध्यम आय। ढैंचा, सन, लोबिया, उड़द, मूंग अउ ग्वार जइसे दलहनी फसल मन कम समय म तियार हो जाथें अउ कम लागत म जादा मात्रा म जैविक पदारथ देथें। ए फसल मन ला फूल आये के पहिली खेत म पलटे ले लगभग 50 ले 60 किलोग्राम प्रति हेक्टेयर तक नाइट्रोजन के आपूर्ति होथे, जेकर से रासायनिक खाद मन के जरूरत कम हो जाथे।
उमन बतइन के हरियर खातू के हमेशा प्रयोग करे ले मिट्टी ह भुरभुरा बनथे, पानी रोके के छमता बाढ़थे, हवा के आवागमन बने होथे अउ अम्लीय अउ क्षारीय भूमि के संतुलन म घलो सुधार होथे। एकर संगेच माटी म सूक्ष्मजीव मन के संख्या अउ सक्रियता बाढ़थे, जेकर से माटी के उर्वरा सकती अउ उत्पादन छमता म लम्बा समय तक बढ़ोतरी होथे। हरियर खातू मिट्टी के कटाव ला रोके म अउ पर्यावरण संरक्षण म घलो बड़ योगदान देथे।
मुख्यमंत्री श्री विष्णु देव साय के अगुवाई म राज्य सरकार किसान मन ला टिकाऊ, कम लागत अउ पर्यावरण-अनुकूल खेती बर प्रोत्साहित करत हे। कृषि विभाग कोती ले किसान मन ला तकनीकी मार्गदर्शन, जागरूकता अउ प्रशिक्षण देहे जात हे, जेकर से राज्य म प्राकृतिक अउ जैविक खेती के दायरा सरलग बाढ़त हे। हिमांशु बंजारे जइसे प्रगतिशील किसान मन के ए पहल ए बात के गवाही आय के सरकार के किसान-केंद्रित योजना मन ग्रामीण अर्थव्यवस्था ला मजबूत करे के संगे-संग अवइया पीढ़ी मन बर सुघर माटी अउ सुरक्षित कृषि बेवस्था के रद्दा म सार्थक परिणाम देवत हे।
प्राकृतिक खेती ला बढ़ावा देहे के उदिम लावत हे बदलाव, हरियर खातू अपनाके आत्मनिर्भर खेती के रद्दा म बढ़त हें किसान
