जनभागीदारी समिति ह कॉलेज म शुरू करिन हेल्प डेस्क, प्रवेश लेने वाला छात्र मन ल नई होही परेशानी

कवर्धा, 27 अगस्त 2020। जिला के सबले बड़का पीजी कॉलेज म अब कॉलेज के जनभागीदारी समिति ह छात्र मन ल एडमिशन म कोनो परेशानी झन होय एखर बर हेल्प डेस्क के शुरुआत करिन हे। दअरसल हर साल कॉलेज के विभिन्न छात्र संगठन डाहर ले छात्र मन के मदद बर हेल्प डेस्क लगात रिहिस। लेकिन ये साल कोरोना संक्रमण ल देखत हुए कॉलेज म कोनो भी छात्र मन ल भीड़ लगाये ले मना करे गे हे। एखर सेती छात्र संगठन ल हेल्प डेस्क लगाये ले मना करे गे हे, लेकिन छात्र मन के एडमिशन ले लेके पीजी कालेज म पहली बार जनभागीदारी समिति ह कॉलेज के बाहर छात्र मन के एडमिशन म होवत परेशानी ल देखत हुए हेल्प डेस्क लगाये हे। जिहां फार्म भरे ले लेके आने सबो प्रकार के परेशानी दूर करे म मदद करत हे। जनभागीदारी समिति के अध्यक्ष मोहित महेश्वरी स्वयं हेल्प डेस्क म बैइठ के छात्र मन के मदद करत हे।