- छत्तीसगढ़ राज्य बर गौरवपूर्ण उपलब्धि
रायपुर, 04 मई 2020। मुख्यमंत्री श्री भूपेश बघेल के सरकार के जन हितैषी योजना अउ जन कल्याण के कार्यक्रम मन ह ओ मन ल जनता के बीच चहेता बना देहे हे। देश के एक ख्याति प्राप्त संस्था कोति ले मुख्यमंत्री मन के काम काज अऊ जनता के बीच उंखर छबि ल लेके कराए गए सर्वेक्षण म छत्तीसगढ़ के मुख्यमंत्री श्री भूपेश बघेल, देश के सर्वाधिक लोकप्रिय मुख्यमंत्री मन म दूसरा स्थान म रहे हें। छत्तीसगढ़ के 81.06 फीसद जनता ह मुख्यमंत्री के काम काज अऊ उंखर जनहितैषी नीति मन ल पसंद करत हें। मुख्यमंत्री श्री भूपेश बघेल अऊ उंखर सरकार के कामकाज के सेती छत्तीसगढ़ पूरा देश म गौरवान्वित होए हे। मुख्यमंत्री के ये गौरवमयी उपलब्धि म रायपुर संग राज्य के आन इलाका मन के जनप्रतिनिधि मन ह आज संझा मुख्यमंत्री निवास कार्यालय पहुंच के मुख्यमंत्री श्री भूपेश बघेल ल बधाई अउ शुभकामना दीन। जन प्रतिनिधि मन ह कहिन के छत्तीसगढ़ सरकार के कामकाज ले जनता खुश हे। ये गौरव के बात हे।
ये बेरा म पूर्व मंत्री श्री धनेन्द्र साहू अऊ श्री सत्यनारायण शर्मा, राज्यसभा सांसद श्रीमती छाया वर्मा, छत्तीसगढ़ वक्फ बोर्ड के अध्यक्ष श्री सलाम रिजवी, विधायक श्री विकास उपाध्याय अऊ कुलदीप जुनेजा, नगर निगम रायपुर के महापौर श्री ऐजाज ढ़ेबर, नगर निगम रायपुर के सभापति श्री प्रमोद दुबे, पूर्व महापौर डॉ. किरणमयी नायक, पूर्व विधायक श्री रमेश वल्र्यानी, सर्वश्री राजेन्द्र तिवारी, गिरीश देवांगन, महेन्द्र छाबड़ा, अजय साहू, गोपाल थवाईत, सन्नी अग्रवाल, मोहम्मद असलम, धर्मेन्द्र यादव, अरूण भद्रा, डॉ. राकेश गुप्ता संग आन जनप्रतिनिधि मन ह मुख्यमंत्री श्री भूपेश बघेल ल पुष्प गुच्छ भेंट करके सम्मानित करिन। ये मौका म मुख्यमंत्री श्री भूपेश बघेल ल बधाई देहे तखतपुर ले पहुंचे वरिष्ठ जनप्रतिनिधि श्री अशरफ बनक ह अपन बागान ले लाए चीकू के टोकरी भेंट करिस अऊ राजीव गांधी किसान न्याय योजना शुरू करे बर मुख्यमंत्री ल बधाई अऊ शुभकामना दीन।
