मुख्यमंत्री श्री साय ह बेमेतरा जिला म करिस 102 करोड़ के राशि के कई ठन विकास काम मन के लोकार्पण अऊ शिलान्यास
बेमेतरा/ मुख्यमंत्री श्री विष्णु देव साय ह कहिन के राज्य सरकार ह बीते डेढ़ बछर म बहुत अकन ऐतिहासिक निर्णय लेहे हे, जेकर उद्देश्य प्रदेश ल विकास कोति आगू बढ़त जनकल्याण ल सर्वाच्च प्राथमिकता देना हे। उमन विश्वास व्यक्त करिन के ये ठोस कदम अवइया समय म छत्तीसगढ़ ल देश बर एक उदाहरण के रूप म स्थापित करही। मुख्यमंत्री श्री साय आज बेमेतरा जिला के नगर पंचायत दाढ़ी स्थित स्टेडियम परिसर म आयोजित विशाल आमसभा ल संबोधित करत रहिन।
मुख्यमंत्री श्री साय ह कहिन के छत्तीसगढ़ सरकार ह अतिक कम समय म जनता ले करे गए अधिकांश वादा मन ल धरातल म उतारे हे। उमन बताइन के गरीब मन के अपन घर के सपना ल साकार करत 18 लाख आवास पास करे गीस। किसान मन ल धान के खरीदी 3100 रूपिया प्रति कुंटल के दर ले करे जात हे, उहें पाछू दू बछर के बकाया धान बोनस घलोक किसान मन ल देहे जा चुके हे।
मुख्यमंत्री श्री साय ह कहिन के महिला मन ल आत्मनिर्भर बनाए के उद्देश्य ले संचालित महतारी वंदन योजना के तहत राज्य के 70 लाख महिला मन ल हर महिना 1000 रूपिया के सहायता देहे जात हे, जेन सामाजिक अऊ आर्थिक सशक्तिकरण के दिशा म एक क्रांतिकारी पहल हे। अइसनहे, पंचायत मन ल डिजिटल रूप ले सशक्त बनाए बर अटल सेवा केंद्र मन के स्थापना करे गए हे, जेखर से ग्रामीण स्तर म ही नागरिक सेवा सुलभ होवत हे।
ए बेरा म म उमन बेमेतरा जिला खातिर 102 करोड़ रूपिया के लागत ले 48 विकास काम मन के लोकार्पण अऊ शिलान्यास करिन जेमां 35.76 करोड़ रूपिया के 22 काम मन के लोकार्पण अऊ 66.91 करोड़ रूपिया के 26 काम मन के भूमिपूजन सामिल हे। मुख्यमंत्री श्री साय ह 20 ग्राम पंचायत मन म सीसी रोड निर्माण बर प्रति पंचायत 5-5 लाख के घोषणा करिन। कार्यक्रम स्थल म मुख्यमंत्री ह पौधारोपण करके पर्यावरण-संदेश दीन अऊ कई ठन विभाग मन कोति ले लगाए गए प्रदर्शनी के अवलोकन घलोक करिन। उमन कई ठन योजना मन के हितग्राही मन ल हितग्राहीमूलक सामान तको बांटिन।
ए बेरा म म उपमुख्यमंत्री श्री अरुण साव ह दाढ़ी नगर पंचायत ल बड़का सौगात देवत कार्यालय भवन निर्माण बर 1.25 करोड़ के स्वीकृति के घोषणा करिन। उमन कहिन के छत्तीसगढ़ सरकार के सबो योजना गांव, गरीब अऊ किसान ल केंद्र म रखके बनाय गए हे अऊ ए वर्ग मन के जीवन ल उन्नत करना सरकार के सर्वोच्च प्राथमिकता हे।
विधानसभा अध्यक्ष डॉ. रमन सिंह ह अपन संबोधन म कहिन के राज्य म डबल इंजन के सरकार छत्तीसगढ़ ल विकास के नवा ऊंचाइ म ले जाय बर प्रतिबद्ध हे। उमन कहिन के गांव, गरीब, किसान, महिला अऊ युवा ए सबो वर्ग मन के जीवन म सकारात्मक बदलाव लाना ही हमर सरकार के दिशा अऊ दृष्टि हे।
ए बेरा म खाद्य मंत्री श्री दयालदास बघेल, विधायक श्री दिपेश साहू, विधायक श्री रोहित साहू, विधायक श्री ईश्वर साहू, रजककार विकास बोर्ड के अध्यक्ष श्री प्रहलाद रजक संग आन जनप्रतिनिधिगण अऊ गणमान्य नागरिक उपस्थित रहिन।
मुख्यमंत्री साय के संकल्प: छत्तीसगढ़ बनही देश के मॉडल राज्य
