आवास के संगें-संग आन जन कल्याणकारी योजना मन उपर काम करत हे मुख्यमंत्री विष्णुदेव के सरकार: प्रभारी मंत्री श्री लखनलाल देवांगन

खैरागढ़, वाणिज्य अऊ उद्योग अउ श्रम मंत्री अउ खैरागढ़ जिला के प्रभारी मंत्री श्री लखनलाल देवांगन ह खैरागढ़ विकासखंड के ग्राम पंचायत सिंघौरी म जिला स्तरीय आवास मेला अउ उन्मुखीकरण कार्यक्रम म सामिल होइन। मुख्य अतिथि मंत्री श्री देवांगन संग आन अतिथि मन के संग ज़िला म नवीन स्वीकृत 9520 आवास के भूमिपूजन करे गीस। मुख्य अतिथि ह गर्भवती महिला मन ल पोषण किट के वितरण करिन। संगेच नान्हें लइका मन के अन्नप्रासन कराइन।
मुख्य अतिथि अउ जिला के प्रभारी मंत्री श्री देवांगन ह कहिन कि प्रधानमंत्री ग्रामीण आवास योजना के शुरूआत 1 अपरेल 2016 ले करे गए रहिस। तब ले लेके आज तक सरलग गरीब मन ल पक्का घर के लाभ मिलत हे। प्रदेश म मुख्यमंत्री विष्णुदेव साय के नेतृत्व म घर के अलावा आन जन कल्याणकारी योजना मन उपर सरकार काम करत हे। गरीब कल्याण योजना के तहत गरीब मन ल मुफ्त चावल देहे जात हे जेन अवइया पांच साल तक सरलग देहे जाही। संगेच घर-घर पेयजल पहुंचाए जात हे। प्रदेश म साय सरकार महतारी वंदन योजना के तहत महिला मन के खाता म हर महिना 1 हजार रूपिया देवत हे। किसान मन ल दू साल के बोनस, समर्थन मूल्य 31 सौ रूपिया म प्रति एकड़ 21 क्विंटल धान खरीदे के संग आन वादा पूरा करे गए हे। मंत्री श्री देवांगन ह प्रभारी मंत्री मद ले सीसी रोड निर्माण बर 10 लाख रूपये के स्वीकृति दे के घोषणा के। उमन सहाड़ादेव ले अवंती स्कूल तक सीसी रोड निर्माण बर 5 लाख रूपिया अऊ मुख्य सड़क ले पुरूषोत्तम के घर तक सीसी रोड निर्माण बर 5 लाख रूपिया के स्वीकृति प्रदान करे के घोषणा करिन।
लोकसभा सांसद श्री संतोष पांडेय ह अपन संबोधन म कहिन कि प्रदेश म मुख्यमंत्री श्री विष्णुदेव साय के सरकार गरीब, किसान, खेतीहर मजदूर मन बर काम करत हे। ऊंखर उत्थान बर सरलग प्रयासरत हे। हमर सरकार बनतेच प्रदेश के 18 लाख परिवार ल पीएम आवास योजना के लाभ देहे गीस। विष्णुदेव सरकार ह अपन वादा निभाए हे। प्रदेश के सरकार जनता के हित म काम करत हे। ये बेरा म खैरागढ़ विधायक श्रीमती यशोदा वर्मा, जिला पंचायत अध्यक्ष श्रीमती गीता घासी साहू ह घलोक कार्यक्रम ल संबोधित करिस।