छोटे कदम, बड़का उड़ान: महतारी वंदन योजना ले हिन्देश्वरी बनिस सफल उद्यमी

मनेंद्रगढ़-चिरमिरी-भरतपुर, छत्तीसगढ़ सरकार के जनकल्याणकारी महतारी वंदन योजना ह प्रदेश के महिला मन के जीवन म नवा ऊर्जा अऊ आत्मविश्वास के संचार करे हे। ए योजना ले लाभान्वित होके मनेंद्रगढ़-चिरमिरी-भरतपुर जिला के श्रीमती हिन्देश्वरी इंदु राजे ह अपन कठिन हालात ल पीछू छोड़त आत्मनिर्भरता के दिशा म ठोस कदम बढ़ाए हे।
पहिली मितानिन के रूप म सेवा दे चुके श्रीमती हिन्देश्वरी ल काम ले विराम लेहे के बाद आर्थिक कठिनाइ के सामना करना परिस। फेर महतारी वंदन योजना के तहत मिलइया 1,000 रुपिया के मासिक सहायता वोखर बर आशा के किरण बनके आईस। ए राशि ले वो ह अपन माता श्रीमती उषा देवी के संग मिलके एक छोट कन होटल व्यवसाय शुरू करिस। सुरू म टेबल, कुर्सि अऊ जरूरी बर्तन बिसा के होटल चालू करे गीस। समय के संग उमन अपन व्यवसाय ल बढ़ाइन अऊ आज उंखर परिवार आर्थिक रूप ले मजबूत स्थिति म हे।
श्रीमती हिन्देश्वरी ह ए बदलाव के श्रेय मुख्यमंत्री श्री विष्णु देव साय के नेतृत्व अऊ महिला अउ बाल विकास मंत्री श्रीमती लक्ष्मी राजवाड़े के मार्गदर्शन ल देवत राज्य सरकार के प्रति आभार प्रकट करे हे।
योजना ले सशक्त होवत महिला
10 मार्च 2024 के शुरू करे गए महतारी वंदन योजना के माध्यम ले अब तक 16 महीना म 10,433.64 करोड़ रूपिया के राशि सीधा प्रदेश के महिला मन ल देहे जात हे। 21 ले 60 साल के आयु वर्ग के विवाहित, विधवा, तलाकशुदा अऊ परित्यक्ता महिला मन ल ये आर्थिक सहायता नियमित रूप ले देहे जात हे। ये योजना केवल आर्थिक सहायता न ही, बल्कि महिला मन के आत्मनिर्भर बने के एक सशक्त आधारशिला बन गे हे। हिन्देश्वरी जइसे अनगिनत महिला मन ए योजना के ज़रिए अपन खुद के व्यवसाय शुरू करत हें अऊ पूरा प्रदेश बर प्रेरणा बनत हें।