किसान मन ल खाद बीज बर झन होवय परेशानी, अधिकारी एकर विशेष ध्यान रखव
कबीरधाम म करिन कई ठन विभाग मन के काम मन के समीक्षा
रायपुर, 20 जून 2024। उपमुख्यमंत्री श्री विजय शर्मा ह कहिन के राज्य अऊ केंद्र सरकार के जनकल्याणकारी योजना के पूरा पारदर्शिता अऊ दक्षता के संग क्रियान्वयन होही अऊ योजना मन के लाभ समाज के हर वर्ग तक पहुँचना चाही। उमन आज कबीरधाम जिला कलेक्टोरेट के सभाकक्ष म राज्य अउ केंद्र सरकार के जनकल्याणकारी योजना, कार्यक्रम अउ कबीरधाम जिला के पूरा विकास बर कई ठन विभाग मन के कामकाज के समीक्षा करत रहिन। उमन अधिकारी मन ल सख्त निर्देश दीन कि विकास काम मन म कोनो प्रकार के लापरवाही नइ होनी चाही।
उपमुख्यमंत्री श्री विजय शर्मा ह कहिन कि खरीफ मौसम म किसान मन ल खाद, बीज भरपूर मात्रा म उपलब्ध होवय, किसान मन ल परेशानी झन होवय। प्रधानमंत्री किसान सम्मान निधि योजना के संबंध म जानकारी लेत उमन कहिन कि जिला के एको पात्र किसान योजना ले वंचित नइ होना चाही। उमन कहिन कि जिला म संचालित सबो स्कूल म पेयजल, शौचालय संग स्कूल भवन के बेहतर रख रखाव होना चाही। अइसनहे उमन बीईओं अउ स्कूल समन्वयक मन ल स्कूल के निरीक्षण करे अऊ सबो स्कूल मन म शाला प्रवेश उत्सव मनाए के घलोक निर्देश दीन।
उपमुख्यमंत्री श्री विजय शर्मा ह पीएम जनमन योजना के समीक्षा म उमन तकनीकी समस्या के सेती छूटे 14 गांव ल लाभान्वित करे के निर्देश दीन। जानबा हे कि बोडला विकासखण्ड के 179 ग्राम अऊ पंडरिया विकासखण्ड के 77 ग्राम सामिल हे। ए दौरान उमन वनांचल क्षेत्र मन बर विशेष कार्ययोजना तैयार करे के निर्देश दीन।