सिलाई के काम में पूजा देवांगन ला मिलिस मजबूत अधार

कोरबा, जिला के रहइया पूजा देवांगन आज आत्मनिर्भरता अउ नारी सशक्तिकरण के एक मिसाल बन गे हें। सिलाई-कढ़ाई के क्षेत्र में आगू बढ़े के ओखर इच्छा ह ओला लाईवलीहुड कॉलेज कोरबा तक पहुँचाइस, जहाँ ले ओखर जिनगी में बड़का बदलाव के सुरूआत होइस। ओ ह सबले पहिली टेलर दरजी के बेसिक ट्रेनिंग लीस। ये ओखर बर वो पहिली मउका रहिस, जे हर ओखर तरक्की ला गति दीस। सात दिन के ट्रेनिंग पूरा करे के बाद ओला चार हजार रूपया के स्टाइपेंड अउ एक लाख रूपया तक के बिना गारंटर वाला लोन मिलिस, जेखर मदद ले ओ ह अपन छोटे से बिसनेस ला आगू बढ़ाए के काम सुरू करिस।
अपन हुनर ला अउ निखारे बर पूजा ह आगू एडवांस टेलर दरजी ट्रेनिंग में भरती लीस। पंदरा दिन के ये ट्रेनिंग में ओला आधुनिक तकनीक, नवा तरीका ले डिज़ाइन तइयार करे अउ आधुनिक मशीन मन के उपयोग के जमो जानकारी मिलिस। ये बखत ओला रोज के पाँच सौ रूपया के हिसाब ले कुल साढ़े सात हजार रूपया स्टाइपेंड अउ एक हजार रूपया रद्दा के खरचा घलो मिलिस। संगे च ओला दू लाख रूपया तक के बिना गारंटर वाला लोन घलो मंजूर होइस, जेखर ले ओखर बाढ़त बिसनेस ला मजबूत अधार मिलिस।
धीरे-धीरे पूजा ह अपन हुनर ला काम म बदलिस अउ घर म ही सिलाई के काम सुरू कर दिस। ओखर मेहनत, ट्रेनिंग ले मिले आतम-बिसवास अउ सरकारी मदद ह ओला आर्थिक रूप ले सक्षम बना दीस। आज पूजा अपन परिवार के मजबूती के अधार आय अउ अपन बिजनेस ला बढ़ाय के रद्दा म आगू बढ़त हे। ओखर ये सफर कतको माइलोगन मन बर प्रेरणा आय के कहूं मउका, पक्का इरादा अउ सही रद्दा मिल जाय त हरेक महिला आत्मनिर्भर बन सकत हे अउ अपन सपना ला पूरा कर सकत हे।