जांजगीर-चाम्पा, जिला के बलौदा विकासखण्ड के अंतर्गत ग्राम करमा अऊ सक्ती विकास खंड अंतर्गत पुजेरीपाली गाँव म रहइया परिवार के संख्या बहुत जादा नइ हे, फेर पानी ल लेके इहां के समस्या बहुत बड़का हे। गर्मी म कुँवा, तालाब अउ गाँव के हैंडपंप घलोक जलस्तर नीचे जाय के सेती सुखा जाथे। उमन पानी के बूँद-बूँद बर मोहताज होथें अउ उंखर आँखी ले आँसु के बूँद झरे लगथे।
अब गाँव म सोलर ड्यूल पम्प लग गए हे त इहां पीए के पानी बर गर्मी के दिन म अब कोनो दिक्कत नइ हे। सोलर ड्यूल पंप ले गाँव म लगे नल अऊ घर के कनेक्शन ले ओ मन ल पानी के धार सरलग मिलत हे। जेखर से घरेलू काम आसान हो गे हे।
बलौदा ब्लाक के करमा अऊ सक्ती ब्लॉक के ग्राम पुजेरीपाली म जल जीवन मिशन के माध्यम ले सोलर ड्यूल पंप लगाए गए हे। जल संकट वाले ये ग्राम म हर साल गर्मी के दिन म पानी के समस्या विकराल हो जात रहिस। करमा गाँव के महिला पटैतीन बाई ह बताइस कि पास के तालाब अऊ कुँवा गर्मी आतेच सूखा जाथे। जेखर से सबो ल पानी बर जूझना परथे। जलस्तर नीचे जाय के बाद समस्या अऊ बाढ़ जाथे। पुजेरीपाली गाँव के युवती हाजरीन बानों ह बताइस कि पास के हैण्डपम्प ले लगातार पानी निकाले ले हैंडपंप घलोक बिगड़ जाथे। गांव म सोलर पंप लगे हे, जेखर से गांव वाले मन अब ल आसानी ले पीए के पानी मिले लगे हे। उमन बताइन कि घर म पेयजल बर सबले जादा महिला मन ल ही परेशानी उठाना परत रहिस। ओ मन ल ही दूरिहा ले पानी लाना परत रहिस। अब ये समस्या दूर हो गए हे।
पानी बर तरसत पुजेरीपाली गाँव म अब बोहात हे पानी के धार
