रायपुर के पुनर्वास केंद्र म दिव्यांग जागेश ल मिलीस नवा जिंदगी

रायपुर, कृत्रिम पैर लगे के बाद 14 वर्षीय बालक जागेश ह रुंधे गला ले बोलिस – मैं ह कभू सोचे नइ रहेंव कि फेर रेंग सकहूं। अब मैं फेर रेंग सकत हंव। मोला नवा जिंदगी मिले हे। खैरागढ़ के ग्राम सलोनी निवासी जागेश वर्मा पिता स्वर्गीय सुकलाल वर्मा ह 5 साल पहिली एक सड़क हादसा म अपन एक पांव अऊ पिता ल खो देहे रहिस। ये दुहरा दुःख ले ओखर जिंदगी म अंधियार छा गए रहिस। दुर्घटना के बाद ओखर परिवार निराश हो गए रहिस। समाज कल्याण विभाग कोति ले रायपुर के माना स्थित राज्य संसाधन पुनर्वास केंद्र (पीआरआरसी सेंटर) म दिव्यांग बालक जागेश ल निःशुल्क कृत्रिम पैर बनाके लगाये ले वोखर जीवन म फेर नवा अंजोर भर गए हे। सेंटर म जागेश ल कृत्रिम पैर ले चले के प्रशिक्षण घलोक देहे गए हे। अब वो चल सकत हे, खेल सकत हे, अपन पांव म खड़ा हो सकत हे।