प्रधानमंत्री श्री नरेंद्र मोदी के अगुवई म देशभर म वित्तीय समावेशन के क्षेत्र म होइस उल्लेखनीय प्रगति : मुख्यमंत्री श्री साय

मुख्यमंत्री श्री साय ह इंद्रावती भवन नवा रायपुर म पंजाब नेशनल बैंक के नवा शाखा के करिन शुभारंभ
रायपुर, मुख्यमंत्री श्री विष्णु देव साय ह आज नवा रायपुर स्थित इंद्रावती भवन परिसर म पंजाब नेशनल बैंक के नवा शाखा, एटीएम अऊ डिपॉजिट मशीन के लोकार्पण करिन। ए बेरा म उमन विभागाध्यक्ष कार्यालय इंद्रावती भवन के कर्मचारी मन, नवा रायपुर के आसपास निवासरत नागरिक मन अऊ बैंक के अधिकारी-कर्मचारी मन ल शुभकामना दीन।
मुख्यमंत्री श्री साय ह कहिन के प्रधानमंत्री श्री नरेंद्र मोदी के अगुवई म देशभर म वित्तीय समावेशन के क्षेत्र म उल्लेखनीय प्रगति होवत हे। पहिली योजना मन के राशि नगद रूप म बांटे जात रहिस, जेखर से लीकेज के समस्या बने रहय, फेर अब बैंकिंग सुविधा मन के विस्तार अऊ डायरेक्ट बेनिफिट ट्रांसफर (DBT) के माध्यम ले हितग्राही मन तक राशि सीधा अऊ पारदर्शी तरीका ले पहुँचत हे। उमन कहिन के बस्तर क्षेत्र म शांति स्थापना के संगे-संग बैंकिंग सुविधा मन के विस्तार घलोक तीव्र गति ले होवत हे। सरगुजा अऊ बस्तर अंचल के दूरस्थ गाँव मन म बैंक शाखा मन के स्थापना ले सरकार के “अंतिम मनखे तक बैंकिंग सुविधा पहुँचाए” के संकल्प साकार होवत हे।
वित्त मंत्री श्री ओ. पी. चौधरी ह कहिन के छत्तीसगढ़ म मुख्यमंत्री श्री साय के अगुवई म गुड गवर्नेंस के दिशा म सरलग काम करे जात हे। अवइया समय म प्रदेश के बैंकिंग सेक्टर अऊ अर्थव्यवस्था बर अपार संभावना मौजूद हे। विकसित भारत के निर्माण म छत्तीसगढ़ के भूमिका महत्वपूर्ण होही अऊ उमन बैंक मन ले घलोक ए दिशा म अपन सक्रिय अउ प्रभावी भूमिका निभाए के आह्वान करिन।
कार्यक्रम म मुख्यमंत्री के सचिव श्री मुकेश बंसल अऊ पंजाब नेशनल बैंक के प्रबंध निदेशक श्री अशोक चंद्र संग आन अधिकारीगण अऊ गणमान्य नागरिक उपस्थित रहिन।