राहेर, मूंग अऊ उरीद के फसल के बोआई करइया किसान मन के हित म मुख्यमंत्री श्री भूपेश बघेल के बड़का निरनय

रायपुर, मुख्यमंत्री श्री भूपेश बघेल आज इहां अपन निवास कार्यालय ले वर्चुअली प्रदेश के 20 उपार्जन केंद्र मन म राहेर, मूंग अऊ उरिद के फसल के समर्थन मूल्य म खरीदी के शुरूआत करिन। ये बेरा म मुख्यमंत्री ह कहिन कि समर्थन मूल्य म खरीदी ले किसान मन के आय बाढही। किसान मन तीर अब विकल्प होही कि ओ मन ल जिहां जादा मूल्य मिलही उहां ओ मन अपन फसल बेच सकहीं। छत्तीसगढ़ राज्य सहकारी विपणन संघ मर्यादित (मार्कफेड) के माध्यम ले राहेर अऊ उरिद के फसल के सबले कम समर्थन मूल्य 6600 रूपिया प्रति क्विंटल अऊ मूंग फसल के फसल 7755 रूपिया प्रति क्विंटल के दर ले खरीदी करे जाही।
किसान मन के सुविधा ल देखत राज्य म 20 उपार्जन केंद्र बनाय गए हे। ये साल उड़द अऊ मूंग के उपार्जन 17 अकटूबर 2022 ले 16 दिसम्बर 2022 तक अऊ अरहर के उपार्जन आगामी साल म 13 मार्च 2023 ले 12 मई 2023 तक के अवधि म करे जाही। ये योजना के अंतर्गत शासन कोति ले पंजीकृत किसान मन ले अरहर 4 क्विंटल., मूंग 2 क्विंटल. अऊ उड़द 3 क्विंटल. प्रति एकड़ के दर ले समर्थन मूल्य म खरीदी करे जाही।
दीवाली ले पहिली लेहे गए सरकार के ये निर्णय ले प्रदेश म अरहर, मूंग अऊ उड़द के फसल के बुआई करइया किसान मन ल प्रत्यक्ष लाभ पहुंचही। योजना के लाभ लेहे बर ए फसल के बुवाई करइया किसान अपन क्षेत्र के ग्रामीण कृषि विस्तार अधिकारी मन ले सेवा सहकारी समिति मन म आवेदन पत्र के संग ऋण पुस्तिका के संग बी-I, पी-II, आधारकार्ड अऊ बैंक पासबुक के छायाप्रति जमा कराके kisan.cg.nic.in पोर्टल म पंजीयन करवा सकत हें, पंजीयन अभी जारी हे, जेकर आखरी तारीक 31 अकटूबर 2022 हे।