राजनांदगांव जिला म समर्थन मूल्य म लघुवनोपज खरीदी ले लघुवनोपज संग्राहक मन ल मिलीस 2 करोड़ 19 लाख 50 हजार रूपिया

राजनांदगांव, छत्तीसगढ़ के वनांचल क्षेत्र लघुवनोपज के खजाना हे। जंगल म निवासरत वनवासी मन बर लघुवनोपज संग्रहण आजीविका के साधन हे। राजनांदगांव जिला सघन वन जैविविधिता ले परिपूर्ण हे अऊ ये जिला लघुवनोपज अऊ औषधीय पौधा ले समृद्ध हे। जिला म शासन कोति ले समर्थन मूल्य म वनवासी मन ले लघुवनोपज के खरीदी करे जात हे। मानपुर अंचल म जिहां महुआ बहुतायत होथे उहें छुईखदान क्षेत्र म बेलगुदा, सरई अऊ छुरिया विकासखंड म चिरायता जइसे औषधीय गुण ले भरपूर वनोपज घलोक प्रचुर मात्रा म हे।
छत्तीसगढ़ म 52 प्रकार के लघुवनोपज के समर्थन मूल्य म खरीदी करे जात हे। जेखर से लघुवनोपज संग्राहक मन म खुशी हे। साल 2020-21 म 7753.69 कुंटल लघुवनोपज के संग्रहण करे गीस, जेखर समर्थन मूल्य म खरीदी ले लघुवनोपज संग्राहक मन ल 1 करोड़ 97 लाख 29 हजार रूपिया के राशि मिलीस। उहें साल 2021-22 म 926.35 कुंटल लघुवनोपज संग्रहित करे गीस अऊ 22 लाख 20 हजार 702 रूपिया के राशि वनोपज संग्राहक मन ल मिलीस। महुआ, चिरायता, पुवाड़ बीज, कालमेघ, बेल गुदा, पलास फूल, आंवला, माहुल पत्ता, साल, लाख, भेलवा बीज, करंज बीज, बहेड़ा, फूल ईमली, धवई फूल, ईमली बीज, हर्रा, कोरिया छाल, बहेड़ा कचरिया, चिरौंजी गुठली जइसे बहुमूल्य लघुवनोपज के संग्रहण करे जात हे।