नारायणपुर, 18 फरवरी 2024। छत्तीसगढ़ के दूरिहा-दूरिहा के बस्ती अउ पहुंच विहीन दुर्गम स्थान मन म स्थित गांव मन म अब मनखे मन ल पीए बर शुद्ध पेयजल मिलत हे। केन्द्र सरकार के जल जीवन मिशन ले अब गांव वाले मन ल आन सोत मन के पानी नइ पीना परत हे। शुद्ध पेयजल मिले ले ग्रामीण खुश हें।
नारायणपुर जिला के कई ठन गांव मन तक जल जीवन मिशन के तहत् दूरिहा-दूरिहा के बस्ती मन तक शुद्ध पेयजल पहुंचत हे। नारायणपुर जिला के पहुंच विहीन गांव मन तक टेपनल के माध्यम ले गांव वाले मन ल घर-घर शुद्ध पेयजल उपलब्ध कराए जात हे। जेमां अधिकांश गांव घना जंगल, पहाड़, नदी, नाला ले घिरे हे। अइसन म जल जीवन मिशन के तहत् सबो बसाहट मन म पेयजल उपलब्ध कराए के काम राज्य शासन ह प्राथमिकता ले कत हे। हर घर नल-जल योजना ले हरेक ग्रामीण परिवार ल 24 घंटा शुद्ध पेयजल के आपूर्ति करे जात हे। जल जीवन मिशन के तहत 439 घर मन म नल कनेक्शन के माध्यम ले शुद्ध पेयजल देहे जात हे।
पहिली मनखे मन ल हैंण्डपंप ले पानी भरे म समस्या होत रहिस, उहें बरसा के समय हैंण्डपंप ले मटमैला पानी आवत रहिस। गर्मी के मौसम म भू-जल स्तर कम हो जाय के सेती मनखे मन ल हैण्डपंप ले पानी निकाले म कठिनाई होत रहिस।
जल जीवन मिशन के तहत् पानी टंकी बन जाए ले हर मौसम म गांव वाले मन ल शुद्ध स्वच्छ पेयजल मिलत हे। लोक स्वास्थ्य यांत्रिकी विभाग ले मिले जानकारी के मुताबिक नारायणपुर जिला म कुल 3275 हैंडपंप स्थापित करे गए हे। एमां ले 3253 हैंडपंप चालू हालत म हे।
दूरिहा-दूरिहा के बस्ती मन तक पहुंचत हे शुद्ध पेयजल
