विश्व मानक दिवस म मुख्यमंत्री ह देवाइस गुणवत्ता शपथ, कहिन — हर क्षेत्र म पारदर्शिता, उपभोक्ता अधिकार अऊ नवाचार सर्वोपरि
विश्व मानक दिवस के अवसर म आयोजित मानक महोत्सव म सामिल होइन मुख्यमंत्री
रायपुर, मुख्यमंत्री श्री विष्णु देव साय ह कहिन के जीवन के हर क्षेत्र म मानक मन के पालन पारदर्शिता, गुणवत्ता अऊ उपभोक्ता अधिकार मन के सुरक्षा खातिर जरूरी हे। उमन कहिन के भारतीय मानक ब्यूरो (बीआईएस) से समान मन ल मानक चिनहा दे के उपभोक्ता मन के हित के रक्षा करत हे अऊ ए माध्यम ले मिलावट अउ नकली जिनिस मन के कारोबार म प्रभावी रोक लगे हे।
मुख्यमंत्री श्री साय आज राजधानी रायपुर के पंडित दीनदयाल उपाध्याय ऑडिटोरियम म विश्व मानक दिवस के अवसर म आयोजित मानक महोत्सव ल संबोधित करत रहिन। ए बेरा म उमन उपस्थित जनता मन ल गुणवत्ता के किरिया खवात मानकीकृत उत्पाद मन ल बढ़ावा देहे अऊ बीआईएस के उदीम मन म भागीदारी निभाए के आह्वान करिन।
कार्यक्रम के समय मुख्यमंत्री ह मानक मन के स्थापना उपर विशेष योगदान देवइया मानक क्लब, संस्था अऊ मेंटर्स मन के सम्मान करिन। उमन भारतीय मानक ब्यूरो के काम मन ल सहरावत कहिन के ये संस्था देशभर म गुणवत्ता के संस्कृति विकसित करे म महत्वपूर्ण भूमिका निभावत हे।
मुख्यमंत्री श्री साय ह कहिन के एक समय रहिस जब सोना जइसे धातु मनके शुद्धता के पता लगाना कठिन रहिस, फेर आज हर उपभोक्ता बीआईएस हॉलमार्क देखके ही गहना बिसाथे। बीआईएस के हॉलमार्क अब उपभोक्ता भरोसा के चिनहारी बन गए हे।
उमन बताइन के बीआईएस ले बोतलबंद पानी, हेलमेट, खिलौना, गहना मन ले लेके करीब 22 हजार समान मन ल मानक चिनहा देहे गए हे। मुख्यमंत्री ह कहिन के उपभोक्ता मन के बीच मानक चिन्हा के प्रति जागरूकता बढ़ाना बहुत जरूरी हे, ताकि गुणवत्तापूर्ण उत्पाद मन ल बढ़ावा मिल सकय।
