पटवारी घर-घर जाके मनखे मन ले लेवत हे राजस्व प्रकरण ले संबंधित समस्या मन के जानकारी
धमतरी, मुख्यमंत्री श्री भूपेश बघेल कोति ले कलेक्टर मन ल राजस्व प्रकरण मन के जल्दी निराकरण के देहे गए निर्देश के परिपालन म धमतरी जिला के धमतरी तहसील म घर-घर अभियान चालू करे गए हे। ये अभियान के तहत पटवारी अपन हल्का के खातेदार अऊ किसान मन के घर-घर जाके उंखर राजस्व प्रकरण ले संबंधित जानकारी लेवत हें अऊ निरधारित प्रक्रिया के तहत राजस्व प्रकरण मन के लउहे निराकरण करत हें। मनखे मन ल घर पहुंचाके राजस्व अभिलेख, जाति, आय, निवास प्रमाण पत्र उपलब्ध कराए जात हे, एखर से मनखे मन ल पटवारी अऊ तहसील कार्यालय के चक्कर नइ लगाना परत हे।
धमतरी तहसील म जिला कलेक्टर श्री पी.एस.एल्मा के हुकुम म 02 नवंबर 2022 ले घर-घर अभियान चालू करे गए हे। ये अभियान के तहत पटवारी मन ल निर्देश देहे गए हे कि-प्रत्येक पटवारी अपन-अपन हल्का के जम्मो गांव म रहवईया खाता धारक मन ले व्यक्तिगत संपर्क करव। खाता धारक मन के फौत के जानकारी होए म वारिसान मन के सूची भुईयां पोर्टल म अपलोड करव। संबंधित तहसीलदार, नायब तहसीलदार निरधारित समयावधि के भीतर फौती नामांतरण के आदेश पारित करव।
पटवारी मन ल ये निर्देश घलोक देहे गए हे कि घर म भ्रमण के समय पटवारी निवासरत मनखे मन ले जाति, आय, निवास प्रमाण पत्र ले संबंधित जानकारी लेवव अऊ ओ मन ल जरूरत होए म संबंधित कागद उपलब्ध करावव। पटवारि मन ल हफ्ता म कम से कम 02 दिन अपन-अपन हल्का के स्कूल म जाके उहां पढ़ईया लईका मन के शत्-प्रतिशत जाति प्रमाण पत्र बनाए म जरूरी सहयोग प्रदान करे के निर्देश घलोक देहे गए हे।
राजस्व प्रकरण मन के जल्दी निराकरण बर ’घर-घर अभियान’
