रायपुर, युवा मन ह क्विज प्रतियोगिता म उत्साह ले हिस्सा लीन। रोचक अंदाज म पूछे जात सवाल जइसे छेरछेरा कब मनाए जाथे, छत्तीसगढ़ के जुन्ना नाम, अरपा पैरी के धार के रचनाकार कोन हे, सवाल करे म युवा मन ह झट ले जवाब दीन।
राजधानी के साइंस कॉलेज मैदान म चलत युवा महोत्सव म छत्तीसगढ़ के संस्कृति, पर्यटन, प्रमुख धरोहर, चिनहा, साहित्य अऊ कलाकार अऊ शासकीय योजना मन के बारे म आयोजित क्विज प्रतियोगिता म युवा मन ह उत्साह के संग जवाब दीन। युवा मन ह राज्य सरकार के महती योजना नरवा, गरूवा, घुरवा, बाड़ी के संबंध म प्रश्न के जवाब घलोक भाग लेवईया मन ह सहजता के संग दीन। क्विज म राष्ट्रीय स्तर के सवाल पूछे गीस। युवा मन म प्रश्न के प्रति जिज्ञासा अऊ उत्सुकता देखे गीस। खेल संचालनालय के ऊपरी हाल म होए क्विज प्रतियोगिता दू आयु वर्ग म 23 जिला मन के युवा मन ह हिस्सा लीन।
क्विज प्रतियोगिता म 15 ले 40 आयु वर्ग म जिला बलौदाबाजार के योगेंद्र कुमार पहिली, रायगढ़ जिला के जितेंद्र प्रधान अउ अभिषेक सत्पथी दूसर अऊ गरियाबंद के किशोर नायक तीसर स्थान म रहिन। उहें 40 साल ले जादा के आयु वर्ग म 5 जिला मन के भाग लेवईया मन ह हिस्सा लीन। जेमां जिला कोरिया के रुद्र मिश्रा व योगेश गुप्ता पहिली, महासमुंद जिला के गुलाब नंद अऊ राकेश नंद दूसर अऊ नारायणपुर जिला ले श्रीमती शैल उसेंडी अउ बी रावटे ह तीसर स्थान प्राप्त करिन।
