- सचिव अऊ संचालक ह अबूझमाड़ म संचालित पोषण पुर्नवास केन्द्र अऊ आंगनबाड़ी केन्द्र के करिन निरीक्षण
- पोषण पुर्नवास केन्द्र ले स्वस्थ होके लहुटे लइका धैर्य के घर जाके जानिन हाल-चाल
नारायणपुर, 23 जुलाई 2020। महिला अउ बाल विकास के सचिव श्री आर प्रसन्ना अऊ संचालक महिला अउ बाल विकास विभाग सुश्री दिव्या उमेश मिश्रा आज अपन नारायणपुर प्रवास के समय ओरछा विकासखण्ड के ग्राम कुंदला म संचालित पोषण पुनर्वास केंद्र के निरीक्षण करिन। उमन खाली अउ भरे बेड के जानकारी लीन। कुंदला पोषण पुनर्वास केंद्र म 10 बेड म ले 4 बेड म लइका भर्ती रहिस। पुर्नवास केन्द्र म लइका मन ल देहे जाने वाला पोषण आहार के बारे म परखर जानकारी लीन। सचिव, श्री प्रसन्ना के पूछे म कर्मचारी मन ह जानकारी दीन के कोरोना संक्रमण के सेती ग्रामवासी केन्द्र म कम आत हें। उमन कर्मचारी मन ले दूरिहा के गांव मन ले कुपोषित लइका मन ल पोषण पुर्नवास केन्द्र तक लाय के व्यवस्था आदि के बारे म जानकारी लीन। एखरे संग उमन जानकारी लेत पूछिन के पुनर्वास केंद्र म खाए पीए के अलग अलग चीज़ मिलथे फेर जनजाति मन के खाए पीए के तरीका अलग हे। गाँव वाले इहां ले जाके ओही चीज़ खाथें या अपन तरीका ले खाथें। पोषण पुनर्वास केंद्र के कर्मचारी मन ह बताइन के लइका मन के संग आये ऊंखर माता ल इहां रसोई म बनाए खाना के विधि के बारे म बताए जाथे, अधिकतर महिला मन घर जाके इहां के बताए विधि मुताबिक ही खाथें-पीथें।
ये बेरा म कलेक्टर श्री अभिजीत सिंह, मुख्य कार्यपालन अधिकारी जिला पंचायत श्री राहुल देव, यूनीसेफ के प्रतिनिधी डॉ फरहद, जिला कार्यक्रम अधिकारी श्री रविकांत ध्रुर्वे संग महिला अउ बाल विकास विभाग के आन अधिकारी-कर्मचारी उपस्थित रहिन। सचिव श्री आर प्रसन्ना अऊ संचालक सुश्री दिव्या उमेश मिश्रा ह अबूझमाड़ विकासखंड के ग्राम पंचायत कोडोली म संचालित आंगनबाड़ी केन्द्र के घलोक निरीक्षण करिन। ये दौरान उमन आंगनबाड़ी केन्द्र म आए महिला अउ लइका मन ले आत्मीय बातचीत करिन। संचालक सुश्री मिश्रा ह महिला मन ले दे जात रेडी-टू-ईट के गुणवत्ता अउ उपयोग के विधि के बारे म पूछिन। महिला मन ह बताइन के जुलाई महिना तक के रेडी-टू-ईट आंगनबाडी कार्यकर्ता मन दे देहे हें। ये बेरा म संचालक सुश्री मिश्रा ह कोडोली आंगनबाड़ी केन्द्र म आये 7 महिना के शिशु कैलाश के अन्न प्रासन्न कराइस। पोषण पुर्नवास केन्द्र ले सुपोषित होके घर गये कुंदला गांव के श्रीमती जनत्री बाई के पुत्र धैर्य के घर पहुंचके उमन उंखर हाल-चाल तको जानिन।
