जशपुर, मुख्यमंत्री श्री विष्णुदेव साय के अगुवाई म छत्तीसगढ़ शासन ह किसान मन के आमदनी बढ़ाय के उद्देश्य ले कृषि विभाग के योजना मन ल बढ़िया ढंग ले लागू करत हे। विभाग डहर ले किसान मन ल खरीफ के संगे-संग रबी फसल के खेती बर घलोक उत्साहित करे जात हे, जेखर ले कम लागत म जादा लाभ पक्का हो सकय।
इही कड़ी म जशपुर जिला के मनोरा विकासखंड के अंतर्गत गाँव सोगड़ा के रहइया सीमांत किसान श्री कीना राम ह रबी मौसम म गहूं के खेती करके बढ़िया लाभ पाय हे। खेती विभाग मनोरा के ग्रामीण कृषि विस्तार अधिकारी के मार्गदर्शन म उनला एनएफएसएनएम (NFSNM) योजना के तहत एक एकड़ जमीन बर उन्नत किसम के गहूं बीज अनुदान म देहे गीस।
किसान श्री कीना राम ह खेत के बढ़िया तैयारी करिस अउ पर्याप्त मात्रा म गोबर खाद के उपयोग करिस। संगेच समय-समय म सिंचाई अउ निंदाई-गुड़ाई म विशेष धियान दिस, जेखर परिणाम ये होइस के गहूं के फसल म कोनो किसम के गंभीर कीड़ा-बेमारी के समस्या नइ आइस अउ फसल के स्थिति बहुत संतोषजनक रहीस। एखर ले अच्छा उत्पादन होय के पूरा संभावना बन गे हे।
किसान कीना राम ह बताइन के वोकर तीर कुल 0.800 हेक्टेयर खेती के जमीन हे। पहिली वो सिरिफ खरीफ म धान के खेती करत रहिस अउ रबी म खेत ल परिया छोड़ देवत रहिस, जेखर सेती गहूं जइसे जरूरी खाय के सामान बजार ले बिसाय खरीदे ल परत रहिस। रबी म गहूं के खेती शुरू करे ले अब न सिरिफ अलग ले आमदनी होवत हे, बल्कि चाउंर के संगे-संग अपन उपयोग बर गहूं अउ आटा घलोक मिल जावत हे।
रबी फसल के मुख्य लाभ
धान के बाद गहूं के खेती ले अतिरिक्त आमदनी, खाली समय अउ संसाधन के सही उपयोग, बढ़िया क्वालिटी के अनाज, अउ रबी म परिया परे जमीन के रकबा खतम होना जइसे कई लाभ आगू आय हे।
किसान श्री कीना राम ह आने किसान मन ले अपील करे हे के वो मन खरीफ के संगे-संग रबी मौसम म घलोक गहूं, दलहन अउ तिलहन फसल के खेती अपनावय, ताकि कम समय अउ कम लागत म जादा आमदनी के संग आत्मनिर्भर बन सकय। उमन रबी फसल के खेती बर रद्दा देखाये अउ सहयोग करे बर विभाग अउ छत्तीसगढ़ शासन के आभार जताइन।