श्री राहुल गांधी ह छत्तीसगढ़ सरकार के काम मन ल सहराइन
मुख्यमंत्री श्री बघेल ह गौर सिंग मुकुट अऊ जड़ी-बूटी के माला पहिनाके श्री राहुल गांधी के करिन स्वागत
तीन दिवसीय राष्ट्रीय आदिवासी नृत्य महोत्सव
के रंगा-रंग आगाज
रायपुर, लोक सभा सांसद श्री राहुल गांधी ह कहिन कि आदिवासी अऊ सबो वर्ग ल जोर के ही देश के तरक्की के रद्दा निकलही। सबो वर्ग अऊ मनखे मन ल जोरना अऊ सबो ल संग लेके चलना हमर सांस्कृतिक पहिचान ये अऊ ईही भावना ए महोत्सव म दिखत हे। ए महोत्सव म आदिवासी संस्कृति अऊ इतिहास ल जाने अऊ समझे के सुघर मौका मिलही। ये महोत्सव हमर विविधता म एकता ल घलोक देखाथे।
लोक सभा सांसद श्री राहुल गांधी ह आज इहां साइंस कालेज मैदान म तीन दिन तक चलइया राष्ट्रीय आदिवासी नृत्य महोत्सव के विधिवत शुभारंभ करिन। समारोह के अध्यक्षता मुख्यमंत्री श्री भूपेश बघेल ह करिन। ए महोत्सव म 25 राज्य मन, 3 केन्द्रशासित राज्य मन अऊ बांग्लादेश, युगांड़ा, मालदीप, बेलारूस, थाईलैण्ड अउ श्रीलंका के करीबन 18 सौ लोक कलाकार सामिल होए हे।
उद्घाटन समारोह म श्री राहुल गांधी ह कहिन कि छत्तीसगढ़ म आदिवासी, किसान, माता अऊ बहिनी सबला संग लेके ही अर्थव्यवस्था ल आगू बढ़ावत हे। ये महोत्सव घलोक सबला जोरे के भावना के परिणाम ये। जब तक आदिवसी, दलित, मजदूर, किसान, महिला मन अऊ समाज के सबो वर्ग ल नइ जोरबोन तब तक देश के अर्थव्यवस्था म सुधार नइ ला सकन। कोनो व्यवस्था ए वर्ग मन ले ही चलथे।
