- आप मन के टीम ह पथरा ल चीर के मोर बेटा ल दीस नवा जीवन..आप मन मोर बर भगवान- गीता
- मुख्यमंत्री बोलिन.. एक-एक नागरिक के जान हमार बर अनमोल, राहुल के पढ़ई के खरचा उठाही राज्य सरकार
- बिलासपुर के हॉस्पिटल म भर्ती राहुल ल देखे बर पहुँचिन मुख्यमंत्री भूपेश बघेल
बिलासपुर, मुख्यमंत्री भूपेश बघेल राहुल ल देखे बर जब बिलासपुर के अपोलो हॉस्पिटल पहुँचिन त मुख्यमंत्री ल देखके राहुल के माँ गीता के आंसू छलके लागिस। गीता ह मुख्यमंत्री ले कहिस आप हमार बर भगवान के समान आव। आप के टीम ह पथरा ल चीरके मोर बेटा के जान बचाए हे। कोनो भूख देखिस ना पियास अऊ ना ही एक पल बर कोनो सुतिन। जब तक राहुल बाहिर नइ आ गीस सबो मनखे अइसन लगे रहिन जइसे उंखरे बेटा फंसे हे। आप मन सब ल, आप मन के लइका मन ल हमर परिवार जीवन भर दुआ देही। मुख्यमंत्री करीब 5 मिनट तक आईसीयू म रुकिन अऊ मां के बात ध्यान से सुनत रहिन। पूरा समय गीता के आंसू गिरत रहिस वो ह हाथ जोड़े खड़े रहिस। मुख्यमंत्री ह राहुल के मां के मूड़ म मया ले हाथ रखके सांत्वना दीन अऊ कहिन कि ये हमर फर्ज रहिस। हमार बर एक एक नागरिक के जान अनमोल हे। श्री बघेल ह राहुल ले घलोक बात करिन अऊ हालचाल जानिन।
मुख्यमंत्री ह कहिन कि सही म पूरा रेस्क्यू टीम ह असाधारण काम करे हे। फेर ये हमर फर्ज रहिस। श्री बघेल ह कहिन कि राहुल के पढ़ई के व्यवस्था राज्य सरकार करही, आप मन ल चिंता करे के जरूरत नइ हे। मुख्यमंत्री ह डॉक्टर मन ल राहुल के बेहतर अऊ समुचित इलाज करे के हुकुम घलोक दीन।
