पूरा गांव म नुआखाई परब के रहिस सुखद संयोग
रायगढ़, मुख्यमंत्री श्री भूपेश बघेल प्रदेशव्यापी भेंट मुलाकात अभियान के तहत आज मंझनिया रायगढ़ विधानसभा के ग्राम लोइंग पहुंचिन। उमन इहां भगवान श्री जगन्नाथ स्वामी मंदिर म पूजा-अर्चना करके प्रदेशवासी मन के खुशहाली के कामना करिन। मुख्यमंत्री श्री बघेल ह मंदिर दर्शन के बाद किसान बहादुर सिदार के नेवता म ऊंखर घर म सादगी के संग भुइंया म बइठ के जेवन करिन। मुख्यमंत्री श्री बघेल के सिदार के परिजन मन ह घर के मुख्यद्वार म श्रीफल भेंट करके आत्मीय स्वागत करिन। ओ मन ल भोजन म चावल, दाल संग षडरस संग 6 प्रकार के साग के संग छौका लगा के डुबकी घलोक परोसे गीस। ए सब्जि मन म लेथा खटाई, मटर पनीर, बड़ी टमाटर, भिंडी, मिक्स वेज अऊ मखाना भाजी के सब्जी घलोक सामिल रहिस।
जानबा हे कि क्षेत्र के कोलता समाज के लेथा खटाई एक खास व्यंजन ये एला समाज के हर विशिष्ट पर्व आदि कार्यक्रम मन म जरुर सामिल करे जाथे। ये बेरा म उच्च शिक्षा मंत्री श्री उमेश पटेल अऊ विधायक श्री प्रकाश नायक घलोक उपस्थित रहिन।
