बहादुरी के मिसाल बनिन राकेश मिंज अउ आर्यन खेस, राज्य वीरता पुरस्कार ले होही सम्मानित

रायगढ़, जिला के दू झन होनहार लईका मास्टर राकेश मिंज अउ आर्यन खेस ह भारी हिम्मत अउ समझदारी देखावत एक मासूम के जान बचाके पूरा जिला के नाम रोशन करे हे। कलेक्टर श्री मयंक चतुर्वेदी के निर्देश म दूनो लईका मन के नाम राज्य वीरता पुरस्कार बर प्रस्ताव भेजे गे रिहिस, जेला शासन ह मंजूरी दे दे हे। अब दूनो वीर लईका मन ल 26 जनवरी के राज्य स्तरीय गणतंत्र दिवस समारोह म राज्य वीरता पुरस्कार ले सम्मानित करे जाही। दूनो ल 25 हजार रूपिया के राशि, प्रशस्ति पत्र अउ मेडल दे जाही। कलेक्टर ह दूनो लईका मन ल उज्ज्वल भविष्य बर गाड़ा-गाड़ा बधाई अउ शुभकामना दिन हे।
महिला अउ बाल विकास विभाग के जिला कार्यक्रम अधिकारी श्री एल.आर. कच्छप ह बताइन के 24 सितंबर 2025 के एक 05 साल के लईका दादू मिंज पानी म बुड़त रिहिस। समय रहत राकेश अउ आर्यन ह हिम्मत देखावत ओला पानी ले बाहिर निकालिन। लईका के पेट म पानी भरा जाए के सेती ओखर हालत गंभीर रिहिस, फेर दूनो ह समझदारी ले पेट दबाके पानी निकालिन अउ ओखर जान बचाइन।