रायगढ़ जिला म मास्क बनाके दिव्यांग हीरामोती घलोक बनिस कोरोना वॉरियर

जिला म स्व-सहायता समूह मन ह 78 हजार 138 मास्क विक्रय कर अर्जित करे 11 लाख 72 हजार रु.

रायगढ़, 03 मई 2020। कोरोना ल हराए बर सबो योगदान देवत हें। अइसन म मोला घलोक लागिस के मैं ये मुश्किल समय म अपन समाज अपन देश के मनखे मन के मदद बर कुछ करंव। मोला सिलाई के काम आथे त मैं ह मास्क बनाए शुरू कर देंव। अब तक करीबन 450-500 मास्क बनाके अपन अऊ आसपास के गाँव म कम कीमत म बेंचत हंव, संगेच जरूरतमंद मन ल बंटवा घलोक देथंव। रायगढ़ जिला के धरमजयगढ़ विकासखंड के अंतर्गत कापू तीर एक छोटे से गाँव बांझीआमा के निवासी हीरामोती नागवंशी जब ये बात बताथे त वोकर चेहरा म उभरत मुस्कान एक जिम्मेदार अऊ कर्तव्यनिष्ठ नागरिक के भूमिका निभाए म मिलत संतोष ल बताय बर काफी हे। ओखर ये योगदान समाज बर ए खातिर अऊ खास हो जाथे के हीरामोती दुनों पैर ले दिव्यांग हे अऊ वो ये सब्बो मास्क हाथ ले चले वाले सिलाई मशीन ले बनाये हे।