रायगढ़ मोर परिवार, मैं अपन परिवार ले मिले आए हंव : मुख्यमंत्री श्री विष्णु देव साय

रायगढ़, मुख्यमंत्री श्री विष्णु देव साय ह आज रायगढ़ जिला के ग्राम बायंग (कछार) म 38 करोड़ रूपिया के लागत ले मांड नदी बायंग एनीकट कम काजवे निर्माण काम के भूमिपूजन करिन। एखर से लाभान्वित गांव मन म भू-जल संवर्द्धन होही अऊ आवागमन के सुविधा घलोक बाढ़ही। एनीकट कम काजवे निर्माण ले 100 हेक्टेयर क्षेत्र म सोलर संयंत्र अऊ पाइपलाइन के संग सिंचाई सुविधा घलोक उपलब्ध कराए जाही। ए बेरा म उप मुख्यमंत्री श्री अरुण साव, वित्त मंत्री श्री ओ.पी. चौधरी अऊ महिला अऊ बाल विकास मंत्री श्रीमती लक्ष्मी राजवाड़े उपस्थित रहिन।
मुख्यमंत्री श्री साय ह लोकार्पण कार्यक्रम म ग्रामवासी मन ल संबोधित करत कहिन के रायगढ़ क्षेत्र म जभो मैं आथंव त अइसे लागथे जइसे अपनेच परिवार के बीच आए हंव। आप सबो मन ह 20 बछर तक आशीर्वाद देके मोला सांसद बनाके दिल्ली भेजे हव, अब मुख्यमंत्री के रूप म मैं अपन परिवार ले मिले आप मन सबके बीच आए हंव। मुख्यमंत्री श्री साय ह राज्य सरकार के उपलब्धि मन के उल्लेख करत कहिन के पाछू 20 महीना म ‘मोदी के गारंटी’ के तहत बहुत अकन जनकल्याणकारी कदम उठाए गे हे। एमां धान के खरीदी 3100 रूपिया प्रति क्विंटल के दर ले, 70 लाख महिला मन ल महतारी वंदन योजना के अंतर्गत प्रतिमाह 1000 रूपिया के सहायता, तेंदूपत्ता संग्राहक मन ल फेर से चरण पादुका देहे के योजना, किसान मन ल धान बोनस अऊ 5 लाख 62 हजार भूमिहीन कृषि मजदूर मन ल हर बछर 10 हजार रूपिया के आर्थिक मदद जइसे योजना सामिल हे।
ए बेरा म जिला पंचायत अध्यक्ष श्रीमती शिखा रविन्द्र गबेल, जनपद पंचायत अध्यक्ष श्रीमती सुजाता सुखलाल चौहान, जनपद पंचायत सदस्य श्रीमती गंगाबाई पटेल, ग्राम बायंग के सरपंच श्री गौरीशंकर सिदार संग बड़ संख्या म ग्रामवासी उपस्थित रहिन।