रायगढ़, मेहनत, लगन अऊ अपन काम उपर भरोसा करके मनखे खच्चित तौर म सफलता हासिल सकत हे, एला रायगढ़ के पुसौर विकासखण्ड के ग्राम जकेला निवासी श्रीमती चन्द्रमा प्रधान ह सही साबित करे हे। वो ह अपन हौसला ले एक सामान्य गृहणी ले सफल उद्यमी बने तक के रद्दा तय करे हे। अपन सफलता ले वो अब अपन जइसे बहुत अकन गृहणि मन बर एक मिसाल बन गए हे।
श्रीमती चन्द्रमा प्रधान घरेलू कामकाजी महिला रहिस, फेर वांखर मन म कुछ करे के ललक अऊ चाह हमेशा ले रहिस। इही बीच ओ ल खादी ग्रामोद्योग बोर्ड के योजना मन के बारे म पता चलिस। वो ह जिला पंचायत रायगढ़ म जाके खादी ग्रामोद्योग विभाग म संपर्क करिस। विभाग म वोला प्रधानमंत्री रोजगार सृजन कार्यक्रम योजना के जानकारी देहे गीस। जानकारी मिले म श्रीमती चन्द्रमा के मन म काम शुरू करे के उत्साह फेर जाग गे अऊ वो ह पेयजल संबंधी मिनरल वॉटर प्लांट बर साल 2020-21 म ऑनलाईन आवेदन करिस। ओ ल सरकार ले व्यवसाय बर 25 लाख रूपिया के करजा मिलीस। महिला होए के सेती वोला करीबन 35 प्रतिशत ग्रामोद्योग विभाग ले अनुदान तको मिलिस। आज ओखर उद्योग प्रधान मिनरल वॉटर के नाम ले स्थापित हो गए हे। इहां सुचारू रूप ले मिनरल वाटर बनाए जात हे।
श्रीमती प्रधान अपन मिनरल वॉटर प्लांट ले पानी पाऊच अऊ केन तियार करथे, जेखर विक्रय आस-पास के क्षेत्र के संग रायगढ़ जिला मुख्यालय, एनटीपीसी लारा अऊ रायगढ़-ओड़िसा के आसपास के इलाका मन म करे जात हे। वो ह ये उद्योग ले अपन बेटा मन ल स्वरोजगार के संग स्थानीय मनखे मन ल घलोक रोजगार उपलब्ध कराए हे। मिनरल वॉटर प्लांट ले ओ ल हर महिना करीबन 25 ले 30 हजार रूपिया शुद्ध लाभ प्राप्त होवत हे। एखर से ऊंखर सामाजिक अऊ आर्थिक स्थिति म लगातार सुधार होवत हे। श्रीमती चन्द्रमा प्रधान ह अपन स्वावलंबी बने म सहायता बर विभाग संग सरकार के आभार व्यक्त करे हे।
गृहणी ले सफल उद्यमी बनिस श्रीमती चन्द्रमा
