धरमजयगढ़ म बिना गुरूजी के स्कूल कुम्हीचुआं के 105 पढ़ईया लईका मन ल मिलिन 04 गुरूजी
गुरूजी मिले ले पढ़ईया लईका मन ल मिलही बेहतर शैक्षणिक वातावरण
युक्तियुक्तकरण ले दूर दराज ग्रामीण क्षेत्र मन म गुरूजी मन के होइस पदस्थापना, पालक मन म खुशी
रायगढ़, जिला के गुरूजी विहीन अउ एकल शिक्षिकीय स्कूल मन बर युक्तियुक्तकरण के कदम दूर दराज के ग्रामीण क्षेत्र के पढ़ईया लईका मन बर महत्वपूर्ण साबित होवत हे। दूरस्थ अंचल मन म गुरूजी विहीन अऊ एके झन गुरूजी वाले स्कूल होए ले लइका मन के पढ़ाई उपर बुरा असर परत रहिस। वो अब युक्तियुक्तकरण ले दूर होवया हे। रायगढ़ जिला के 21 गुरूजी विहीन अऊ 267 एकल शिक्षिकीय स्कूल मन ल अब गुरूजी मिल गे हे। एखर से ए स्कूल मन म शैक्षणिक वातावरण बेहतर होही।
राज्य शासन के दिशा-निर्देश म जिला म अतिशेष गुरूजी मन के काउंसलिंग के प्रक्रिया पूरा होए के बाद अब जिला के दूरस्थ क्षेत्र मन म मौजूद गुरूजी विहीन अऊ एकल गुरूजी वाले विद्यालय मन ल नवा गुरूजी मिल गे हे। एखर से अब न केवल ए क्षेत्र मन के स्कूल मन ल नवा गुरूजी मिले हे भलुक पढ़ईया लईका मन बर गुणवत्ता पूर्ण शिक्षा घलोक सुनिश्चित होए हे। रायगढ़ जिला के आखरी छोर धरमजयगढ़ विकासखंड के कुम्हीचुंआ के प्राथमिक शाला म 105 विद्यार्थी हे, ये स्कूल गुरूजी विहीन रहिस। फेर अब युक्तियुक्तकरण ले इहां के पढ़ईया लईका मन ल 4 नवा गुरूजी मिल गे हे। एखर बारे म सचिव श्री ईश्वर डनसेना ह बताइस के सरपंच अउ गांव वाले मन कोति ले लइका मन के भविष्य ल देखत गुरूजी मन के मांग रखे गए रहिस। सुदूर क्षेत्र के लइका मन ल पढ़ाई म अड़बड़ दिक्कत के सामना करना परत रहिस। अभी हाल म गुरूजी नइ होए ले कक्षा पहली ले पांचवीं तक के लइका मन के भविष्य अधर म रहिस। फेर आज युक्तियुक्तकरण के माध्यम ले शाला ल गुरूजी मिले ले लइका मन के भविष्य म आशा के एक नवा किरण दिखे लगे हे।
युक्तियुक्तकरण ले बिना गुरूजी के स्कूल मन म अब बगरही ज्ञान के अंजोर
