लोकस्वास्थ्य यांत्रिकी, नगरीय निकाय अउ स्वास्थ्य विभाग के अमला रहव अलर्ट
सबो स्वास्थ्य केन्द्र मन म भरपूर दवई रहय
जल स्त्रोत मन के करे जाए क्लोरिनेशन
रायपुर, 03 जून 2024/ मुख्यमंत्री श्री विष्णु देव साय ह वर्षाजनित बीमारी मन के रोकथाम बर सबो जरूरी तैयारी ठउका करे के हुकुम अधिकारी मन ल देहे हें। मुख्यमंत्री श्री साय ह मानसून के समय संभावित बीमारी मन के रोकथाम बर अधिकारी मन ल राजधानी ले लेके ग्राम पंचायत तक सरलग सतर्क रहे के निर्देश दीन। उमन प्रदेश के सबो अस्पताल अऊ स्वास्थ्य केन्द्र मन म सबो जरूरी जीवन रक्षक दवाई मन के भरपूर मात्रा म उपलब्धता सुनिश्चित करे ल कहे हें। मुख्यमंत्री ह हैंडपंप, नलकूप, अउ जल स्त्रोत के मरम्मत, साफ-सफाई अऊ क्लोरिनेशन कराए के घलोक निर्देश दीन। ब्लीचिंग पाउडर अऊ क्लोरिन टैबलेट के भरपूर मात्रा म उपलब्ध होही। मुख्यमंत्री ह वर्षाजन्य बीमारी मन अउर आन समस्या मन ले निपटेबर प्रशासनिक अमला के संग लोकस्वास्थ्य यांत्रिकी, नगरीय निकाय अउ स्वास्थ्य विभाग के अमला ल अलर्ट रहे ल कहे हें।
मुख्यमंत्री ह कहिन हे कि बरसात के मौसम म उल्टी-दस्त, मलेरिया आदि मौसमी बीमारी मन के होए के जादा आशंका रहिथे। पेयजल स्त्रोत मन के सफाई जइसे छोटे-छोटे उपाय ले ए बीमारी मन के प्रकोप ले बचे जा सकत हे। राज्य म संक्रामक बीमारी मन के दृष्टि ले संवेदनशील गांव मन अऊ इलाका मन म स्वास्थ्य विभाग के अमला ल सरलग निगरानी घलो करे ल उमन कहिन।
सांप चाबे ले बचाव बर स्वास्थ्य केन्द्र म उपलब्ध होवय एन्टी स्नेक वेनम:- मुख्यमंत्री ह निर्देश दीन के जशपुर अंचल संग अइसन क्षेत्र जहां सर्पदंश के मामला जादा आत हे वो इलाका मन म बचाव बर मनखे मन ल जागरूक करे जाए। संगेच सबो प्राथमिक स्वास्थ्य केन्द्र अऊ सामुदायिक स्वास्थ्य केन्द्र मन म एन्टी स्नेक वेनम के भरपूर मात्रा म उपलब्धता सुनिश्चित करे के संग स्वास्थ्य केन्द्र मन म सर्पदंश के प्रकरण ल हैण्डल करे बर चिकित्सक अउ प्रशिक्षित स्वास्थ्यकर्मी उपलब्ध रहव।
मुख्यमंत्री ह वर्षाजनित बीमारी मन न ले बचाव बर मनखे मन ल जागरूक करे के निर्देश घलोक दीन। बारिस के मौसम म घर के आसपास जल जमाव झन होवय, ताकि मच्छर झन पैदा होए। सर्दी-बुखार, खांसी, उल्टी-दस्त समस्या होए म मनखे ल स्वास्थ्य केन्द्र जाव अऊ चिकित्सक के सलाह ले ही दवा के सेवन करव।
