मोर गांव मोर पानी महाअभियान ले जुड़के उठाइस कदम
प्रधानमंत्री आवास म रेन वाटर हार्वेस्टिंग सिसटम लगाके पेश करिस मिशाल
कोरिया, जब आप सकारात्मक बदलाव ल अपन जीवन म आगू बढ़ के अपनाथव त आप खुदे मिशाल बन जाथव।आप जेन स्तर म रहिके सुधार करना चाहहू कर सकत हव अइसनहे सकारात्मक खबर कोरिया जिला ले हे। प्रदेश के मुख्यमंत्री श्री विष्णु देव साय कोति ले जारी मोर गांव मोर पानी महाअभियान ले जुड़के ग्राम पंचायत सोरगा म रहइया श्रीमती तस्कीन खातून ह कोरिया जिला म जल संरक्षण बर एक नवा मानक तैयार कर देहे हे। वोखर ए सराहनीय काम के सकारात्मक प्रभाव पूरा क्षेत्र म फैलत हे। प्रधानमंत्री आवास योजना ग्रामीण के हितग्राही श्रीमती तस्कीन खातून ह बड़का शहर म अपनाए जात रेन वाटर हार्वेस्टिंग सिसटम ल बढ़ावा देहे बर खुदे अपन नव बने घर म बनवा लेहे हे।
कोरिया जिला के जनपद पंचायत बैकुंठपुर म प्रधान मंत्री आवास योजना ग्रामीण अंतर्गत ग्राम सोरगा म रहइया श्रीमती तस्कीन खातून ल पउर साल अपन पक्का मकान बनाए बर अनुदान प्रदान करे गीस। वो ह अपन कमाई के कुछ रकम के संग अपन पक्का मकान के सपना पूरा कर लेहे हे। एखर बाद घर बनाए म बचे सामान टूटे ईंटा आदि ले सोखता पिट बनवाए हे अऊ नवा घर के छत के पानी के निकाशी ल पाइप के माध्यम ले सोखता गड्ढा तक जुड़वा लेहे हे।
का कहिथे हितग्राही तस्कीन
जिला म जल संरक्षण बर चलत अभियान ले हम प्रेरणा लेन, जब तक हमन अपन जिम्मेदारी ल नइ समझबो तब तक मोर गांव मोर पानी महाअभियान ले जल संरक्षण के काम अधूरा ही रहि जाही। ते पाए के हमन कलेक्टर कोरिया के अपील म अपन नवा घर म जल संरक्षण बर हार्वेस्टिंग सिसटम लगवा लेहे हन अऊ मै आग्रह करत हंव के सबो अपन छत म गिरइया हरेक बूंद ल बचावव।
कलेक्टर कोरिया श्रीमती चंदन त्रिपाठी ह सोरगा ग्राम पंचायत म श्रीमती तस्कीन खातून के प्रयास के सराहना करत कहिन के प्रदेश म मोर गांव मोर पानी महाअभियान अंतर्गत जिला म आवा पानी झोंकी अभियान चलाए जात हे अऊ ये पहल अवइया समय म कोरिया ल जल संरक्षण बर एक अलग पहिचान देवाए म मदद करही।
श्रीमती तस्कीन के नवा छत म गिरे जम्मो पानी ह अवइया दिन बर सकलाही
