मुख्यमंत्री सामिल होइन अधिवक्ता मन के सम्मान समारोह म
रायपुर, मुख्यमंत्री श्री भूपेश बघेल ह कहिन हे कि न्याय देवाए म अधिवक्ता मन के महत्वपूर्ण योगदान हे। उमन कहिन कि अधिवक्ता नागरिक मन ल ऊंखर अधिकार अऊ कर्त्तव्य मन के जानकारी देके जागरूक करे अऊ विधिक सहायता के माध्यम ले गरीब मन के सहायता करके ओ मन ल जल्दी न्याय देवाए म योगदान देवत हें। श्री बघेल ह ये आशय के विचार काली संझा रायपुर के जिला न्यायालय परिसर म आयोजित अधिवक्ता संघ के सम्मान समारोह म व्यक्त करिन। उमन ये बेरा म कई ठन प्रतियोगिता म विजयी अधिवक्ता मन ल स्मृति चिन्ह प्रदान करके सम्मानित करिन। अधिवक्ता संघ कोति ले घलोक मुख्यमंत्री के स्वागत करके अभिनंदन करे गीस।
श्री भूपेश बघेल ह कहिन कि राजधानी रायपुर के अधिवक्ता संघ के गौरवशाली इतिहास रहे हे। आजादी के लड़ाई म घलोक अधिवक्ता मन के महत्वपूर्ण योगदान रहे हे। ये बेरा म उमन पंडित रविशंकर शुक्ल, श्री वामनराव लाखे, डॉ. हरिसिंह गौर, ठाकुर प्यारेसिंह, श्री खूबचंद बघेल संग महत्वपूर्ण योगदान देवइया आन मनखे मन के स्मरण करत ऊंखर काम मन के उल्लेख करिन। श्री बघेल ह ग्रामीण अर्थव्यवस्था ल मजबूत बनाए बर सुराजी गांव योजना के विस्तार ले जानकारी देवत कहिन कि राज्य के अर्थव्यवस्था म कृषि अऊ किसान महत्वपूर्ण हे। समारोह म 35 साल ले जादा समय तक उल्लेखनीय योगदान देवइया अधिवक्ता मन ल घलोक सम्मानित करे गीस। ये बेरा म जिला अउ सत्र न्यायाधीश श्री रामकुमार तिवारी, न्यायाधीश, विधायक श्री कुलदीप जुनेजा, पूर्व महापौर श्रीमती किरणमयी नायक, अधिवक्ता संघ के पदाधिकारी अऊ अड़बड़ झन अधिवक्ता उपस्थित रहिन।
जिला अउ सत्र न्यायाधीश श्री रामकुमार तिवारी ह कहिन कि नागरिक मन ल न्याय प्रदान करे बर जिला म महत्वपूर्ण काम करे जात हे। लोक अदालत के माध्यम ले अड़बड़ झन प्रकरण मन के निराकरण करे गए हे। उमन कहिन कि जिला सत्र न्यायालय कोति ले अधिवक्ता मन के सहयोग ले समय-समय म जागरूकता अभियान चलाके नागरिक मन ल ऊंखर अधिकार अऊ कर्तव्य मन के जानकारी के संगेच विधिक सहायता के माध्यम ले सुविधा मन के घलोक जानकारी दिए जात हे।
