रायपुर: जनचौपाल म नागरिक मन ह कलेक्टर ल बताईन अपन समस्या

रायपुर, 13 फरवरी 2024। कलेक्टर डॉ गौरव सिंह ह कलेक्टोरेट परिसर के रेडक्रॉस सभाकक्ष म जन चौपाल के माध्यम ले जिला के कई जगा ले आए नागरिक मन के समस्या सुनीन अऊ अधिकारी मन ल निराकरण करे के निर्देश दीन। काली जनचौपाल म 42 आवेदन आइस। कलेक्टर ह आवेदन मन के अवलोकन करके नियमानुसार पात्र हितग्राही मन ल लाभान्वित करे बर अधिकारी मन ल कहिन।
जनदर्शन म आज ग्राम करहीडीह के किसान श्री फूलसिंह वर्मा ह किसान समृद्धि योजना अंतर्गत विद्युत नइ मिले, ग्राम नरदहा निवासी चंदूलाल ह प्रधानमंत्री आवास योजना के लाभ देवाए, राजधानी के ब्राह्मण पारा के हनुमान मंदिर विकास समिति ह अवैध कब्जा के शिकायत, गुढ़ियारी निवासी श्री प्रवेश ठाकरे ह अपन जमीन के नक्शा म गलती सुधार करवाए, गोकुल नगर ग्वाल पाल संघ ह डेयरी क्षेत्र के बीच म नगर निगम रायपुर के प्रस्तावित मितानीन सामुदायिक भवन ल आन जगा बनवाए, विजयलक्ष्मी वर्मा ह राशन कार्ड ले अपन नाम कटवाए, भानपुरा निवासी लालाराम मंडले ह वृद्धा पेंशन नइ मिले के शिकायत, ग्राम संडी के किसान चंद्रशेखर वर्मा ह धान बेचे के उपरांत राशि आहरण नइ होए के समस्या संबंधी आवेदन दीस। कलेक्टर ह सबो आवेदन मन म यथासंभव निराकरण करे अधिकारी मन ल निर्देश दीन।
जानबा हे कि हरेक सोमवार भिनसरहा 11 बजे ले मंझनिया 1 बजे तक जन चौपाल के आयोजन होथे। जेमा जनसामान्य अपन समस्या के समाधान बर पहुंचथें।