मुख्यमंत्री विष्णु देव साय के अगुवाई म छत्तीसगढ़ ह सार्वजनिक स्वास्थ्य के क्षेत्र म देश भर म बड़का उपलब्धि हासिल करिस

रायपुर, मुख्यमंत्री विष्णु देव साय जी के अगुवाई म छत्तीसगढ़ ह स्वास्थ्य के क्षेत्र म पूरा देश म अपन नांव रोशन करे हे। रायपुर जिला अस्पताल म बने इंटिग्रेटेड पब्लिक हेल्थ लेबोरेटरी (IPHL) ह देश के अइसन पहली प्रयोगशाला बन गे हे, जेला नेशनल क्वालिटी एश्योरेंस स्टैंडर्ड्स (NQAS) के परमान-पत्र मिले हे। ए बड़का उपलब्धि बर केंद्रीय स्वास्थ्य मंत्री जे.पी. नड्डा ह चिट्ठी लिख के राज्य सरकार अउ स्वास्थ्य मंत्री श्याम बिहारी जायसवाल ल गाड़ा-गाड़ा बधाई देहे हे।
नड्डा जी ह कहिन के रायपुर के ए लैब ह देश भर म एक माडल बन गे हे। उमन बताइन के ए सर्टिफिकेट मिलना ये बात के सबूत हरे के छत्तीसगढ़ म अब मरीज मन ल जांच के बढ़िया अउ भरोसा लायक सुविधा मिलत हे। केंद्रीय मंत्री ह एखर सेहरा रायपुर जिला अस्पताल के कर्मचारी मन अउ राज सरकार के मेहनत ल दीन, जेखर ले जनता के भरोसा सरकारी अस्पताल ऊपर बाढ़े हे। बता दन के ए लैब प्रधानमंत्री आयुष्मान भारत हेल्थ इन्फ्रास्ट्रक्चर मिशन के तहत बनाए गे हे, जेखर उद्देश्य देश म बीमारी के जांच अउ आपदा ले निपटे के तैयारी ल मजबूत करना हे।
केंद्रीय मंत्री ह कहिन के रायपुर के ए लैब ह मशीन, आदमी अउ सुविधा—सब्बो म खरा उतरे हे। उन मन सलाह दीन के राज्य सरकार ल एला ‘बेस्ट प्रेक्टिस’ मान के बाकी जिला म घलो अइसने सुविधा शुरू करना चाही। ए खबर ले खुश होके मुख्यमंत्री विष्णु देव साय ह केंद्र सरकार के आभार मानीन अउ कहिन के हमर सरकार तकनीक अउ क्वालिटी वाले इलाज बर पूरा जोर लगावत हे। उहें स्वास्थ्य मंत्री श्याम बिहारी जायसवाल ह कहिन के ये हमर डाक्टर अउ स्टाफ के मेहनत के फल हरे। उन मन भरोसा देवाइन के रायपुर के तर्ज म अब पूरा छत्तीसगढ़ म अइसने लैब विकसित करे जाही, ताकि हर नागरिक ल सही समय म सही जांच के सुविधा मिल सकय।