रायपुर, मुख्यमंत्री श्री भूपेश बघेल ले आज संझा ऊंखर निवास कार्यालय म रायपुर केरला समाजम के प्रतिनिधिमंडल ह सौजन्य मुलाकात करिस। प्रतिनिधिमंडल ह मुख्यमंत्री ल रायपुर केरला समाजम कोति ले आयोजित ओणम त्यौहार के कार्यक्रम म बतौर मुख्य अतिथि सामिल होए के नेवता दीन। प्रतिनिधिमंडल ह बताइस कि ओणम केरल के प्रमुख त्योहार ये। ये पर्व फसल कटाई अऊ खुशहाली के चिनहा ये जेन ल हर वर्ग के मनखे मिल जुल के एक संग मनाथे। ये साल रायपुर केरला समाजम कोति ले राजधानी रायपुर म 17 सितंबर के ओणम पर्व के कार्यक्रम आयोजित करे जात हे।
प्रतिनिधिमंडल ह मुख्यमंत्री ल शॉल भेंट करके उंखर सम्मान करिन। मुख्यमंत्री ह ओणम पर्व के कार्यक्रम म आमंत्रण बर रायपुर केरला समाजम ल धन्यवाद देवत कार्यक्रम के सफल आयोजन बर अपन शुभकामना दीन। ये बेरा म रायपुर केरला समाजम के अध्यक्ष श्री विजय शशीकुमार संग सर्वश्री टी से शाहजी, थॉमस एंथोनी, फिलिप सैमुअल, सुभाष एस, सुनील पिल्लै, पीवी शशिन्द्रन, अनिल मैथ्यू, अब्राहम लूकोज, बीजू वर्गीश, शैलेश नायक संग आन पदाधिकारी उपस्थित रहिन।
