मनरेगा ले माईलोगन मन ल मिलिस रोजगार अउ आत्मनिर्भरता के नवा रद्दा

मुंगेली, गाँव के माईलोगन मन ल आर्थिक रूप ले मजबूत बनाय म महात्मा गांधी राष्ट्रीय ग्रामीण रोजगार गारंटी योजना (मनरेगा) ह बड़े भूमिका निभावत हे। मुंगेली जिला म ए योजना के तहत माईलोगन मन ल रोजगार, हुनर (कौशल विकास) अउ कमाय-धाय के नवा मउका देवत हे। एखर ले माईलोगन मन अपन परिवार ल आर्थिक सहारा देहे के संग  समाज म घलो मजबूत बनत हें।
जिला म मनरेगा के तहत अब तक 98 हजार 512 ले जादा माईलोगन मन ल रोजगार मिले हे। वित्तीय बछर 2025-26 म अब तक 69 हजार 927 माईलोगन मन ल 19.56 लाख मानव दिवस के काम देहे गे हे। एखर ले हर माईलोगन ल औसत रूप म 7 हजार रुपिया ले जादा के कमाई होय हे, जेकर ले ओमन के आर्थिक हालत म सुधार आए हे।
माईलोगन मन के कमई ल बढ़ाय बर मनरेगा ले आजीविका डबरी के निर्माण कराय जात हे। ए डबरी मन के मयधम ले माईलोगन मन मछरी पालन, साक-भाजी उत्पादन अउ खेती-किसानी के काम कर के अलग ले पइसा कमावत हें। एखर संग चल्त ‘प्रोजेक्ट उन्नति’ के तहत मिहनतकस मन के हुनर बढ़ाय बर ट्रेनिंग कार्यक्रम घलो चलाय जात हे। ग्रामीण स्वरोजगार प्रशिक्षण संस्थान कोती ले 13 दिन के आवासीय ट्रेनिंग दे के 35 स्व-सहायता समूह के माईलोगन मन ल ‘कृषि सखी’ के रूप म तैयार करे गए हे।
मनरेगा के काम-काज म माईलोगन मन के भागीदारी बढ़ाय बर ओमन ल ‘मेट’ के पद म घलो पहिली मउका देहे जात हे। जिला म अब तक 1,117 माईलोगन मन ल मेट के रूप म चुने गे हे, जेमन काम के जगा म मजूर मन के बीच तालमेल अउ काम के संचालन म बड़े भूमिका निभावत हें। एखर अलावा, जे माईलोगन मन चाहत हें ओमन ल डबरी, पशु शेड, बकरी शेड अउ सूकर शेड जइसे निजी काम मन के घलो मंजूरी देहे जात हे। ए सब कोसिस ले गाँव के माईलोगन मन ल कमाय के पक्का साधन मिलत हे अउ ओमन आत्मनिर्भरता कोती तेजी ले आगू बढ़त हें।