छत्तीसगढ़ के मुंगेली जिला के महतारी मन ह अपन मेहनत अउ लगन ले नवा मिसाल पेश करे हें। रायपुर के इंडोर स्टेडियम म आयोजित ‘लखपति दीदी’ कार्यक्रम म मुंगेली जिला के दीदी मन ह अपन सफलता के कहानी सुनावत बताइन के कइसे समूह ले जुड़ के ओमन आत्मनिर्भर बनिन।
मोहभट्टा के धनेश्वरी ला मिलिस आजीविका के मजबूत अधार
मुंगेली, अंतराष्ट्रीय महिला दिवस के मउका म रायपुर के इंडोर स्टेडियम म आयोजित ‘लखपति दीदी’ गोठ कार्यक्रम म प्रदेश भर ले आय महिला मन ह आत्मनिर्भरता के प्रेरक कहानी साझा करिन। ए कार्यक्रम म मुंगेली जिला के महिला मन घलो अपन सफलता के गोठ सुना के सबला प्रेरित करिन।
पथरिया विकासखंड के चंदखुरी म रहइया ‘जय माँ शीतला स्व-सहायता समूह’ के सदस्य श्रीमती उषा श्रीवास ह बताइस के समूह ले जुड़े के बाद ओमन छोटे स्तर ले अपन काम-बूता शुरू करिन। समूह के सहयोग, ट्रेनिंग अउ पइसा के मदद ले ओमन अपन काम ला आगू बढ़ाइन अउ आज आर्थिक रूप ले मजबूत बन के ‘लखपति दीदी’ के रूप म अपन पहिचान बनाय हें।
वइसनहे, ग्राम पंचायत मोहभट्टा के श्रीमती धनेश्वरी साव ह घलो अपन प्रेरक यात्रा के बारे म बताइस। ओ ह कहिस के स्व-सहायता समूह ले जुड़े के बाद ओ ला आजीविका के एक ठन मजबूत अधार मिलिस। सरलग मेहनत अउ समूह के संग ले ओ ह अपन आय बढ़ाइस अउ आज अपन परिवार के संगे-संग दूसर महतारी मन बर घलो प्रेरणा बन गे हें।
कार्यक्रम म महिला मन ला संबोधित करत मुख्यमंत्री विष्णुदेव साय ह कहिस के राज्य सरकार महिला मन के आर्थिक मजबूती बर सरलग कोसिस करत हे। स्व-सहायता समूह के माध्यम ले महतारी मन आत्मनिर्भर बनत हें अउ प्रदेश के विकास म बड़े भूमिका निभावत हें। ए मउका म अलग-अलग जिला ले आय लखपति दीदी मन ह अपन अनुभव साझा करत बताइन के सामूहिक प्रयास, ट्रेनिंग अउ सरकारी योजना मन के मदद ले आज महिला मन आत्मनिर्भरता के नवा मिसाल कायम करत हें।